Anda di sini

‘Program Semarak Ceria K1M’ dikearap nyaup ngurangka birokrasi ba perintah

Advertisement

KUCHING: ‘Program Semarak Ceria 2014 Komuniti 1Malaysia (K1M)’ Pelilih Kuching nerima sambut ke manah ari mensia mayuh lalu matak 28 bengkah K1M ngelingi mengeri Kuching.

Diatur di Palan Bebeli Barang Eastern Mall, Siburan program dua hari berunggu berengkah 17 ngagai 18 Mei nengah kerejasama Opis Pemadah Nengeri, Opis Penyambung enggau MultiMedia Malaysia.

Chairman Pengatur Program Ahmad Nahap madah program ke diatur dua hari nya udah nyapai juluk ke ditetap.

“Juluk kitai deka nyadung penerang terus ngagai rayat lalu angkun deka ngurangka birokrasi nengah program dua hari berunggu ditu,” ku iya maya bejaku ba pengawa ti dipenyadika Sapit Menteri Pengeraja Asal enggau Rampa Menua Dato’ Sri James Dawos Mamit, kemari.

Ku Ahmad nambah, mayuh macham pengawa enggau main diatur rambau program nya ke nyengkaum pengawa bejual pemakai enggau ai irup, licha senentang GST sereta pengawa mandangka tanda asal pupu bansa nyengkaum pekit pemajik kebaya.

Ba kaul ke sama, Dawos ngarap program ulih diadu baru ba taun ti deka datai ke alai iya pechaya program nya ulih meri penerang ngagai rayat senentang polisi perintah.

Iya ke mega Kaban parlimen Mambong ngelalau K1M ulih megai tanggung pengawa napi pemar enggau penguji rama ti tau ngeruga penegap runding raban nembiak.

“Kemaya haritu, raban nembiak napi penguji enggau pemar ketegal gaya idup ti enda besekat baka ke penyalah makai dadah enggau gian alkohol.

“K1M patut nyaup napi pemar tu nengah chara ngatur mayuh agi program baka ke ngatur pengawa main enggau lumba sereta ke bukai,” ku iya.

Advertisement