Anda di sini

Perambu ngemanahka parit besai ba mua Chapel Taman Malihah disukung piak MPP

Advertisement

KUCHING: Opis Kaunsil Kandang Bandar Padawan (MPP) nerima manah perambu ari komuniti Chapel Taman Malihah ti deka nutup sereta ngemanah parit besai ba mua chapel nya.

Ngakun nya sebengkah perambu ke manah, sapit chairman MPP Dr Zaidi Suhaili madah runding ke bansa nya ukai semina mulaika pemaik ngagai komuniti di Chapel Taman Malihah tang mega deka bela diasai orang bukai ke diau ngelingi.

“Sigi nyadi tanggung pengawa MPP nengah konsep Pemansang Bepelasarka komuniti ti di atur enggau tuju ngedutka kaul entara raban dalam opis kaunsil enggau mensia mayuh lalu ngangkatka kandang endur MPP nyadi palan ke pemadu lantang sereta likun endur diau.

“Tadi kitai udah mendingka chunto ke manah ke alai raban ari chapel udah netapka deka ngemanah parit besai ba mua chapel lalu mega deka ngintu pemeresi parit nya ninting maya.

“Kami ba MPP nerima manah pemutus nya lalu deka beratika dulu perambu pelin dikena nentuka parit likun ditengah komuniti chapel enggau orang bukai,” ku iya.

Iya mansutka jaku nya ba Pengerami Mantar Gawai 2014 ke diatur Chapel Taman Malihah nengah kerejasama MPP di laman Chapel nya ditu, malam ensanus.

Nyerumba pengawa ngintu Gawai Dayak kenaka 1 Jun tu, Dr Zaidi mega meri basa ngagai pemeri tauka pengawa manah ari komuniti Dayak ngagai nengeri tu.

“Raban Dayak mantu ngenegap ekonomi, politik enggau pengawa rama lalu semua pekara nya enda ulih disangkal agi.

“Aku semina deka ngingatka kitai semua baik nya Dayak, Melayu, China tauka bansa bukai ngambika seruran bejejaga enggau ulah jai sekeda raban ti deka ngeruga penyerakup enggau pengelantang ti udah dikembuan kitai ngelama tu.

“Atur bebasaka batang pengarap pangan diri ke diasaika kitai di Sarawak maya tu udah nyadi reta ke pemadu berega lalu patut diintu enggau manah, tandu iya.

Advertisement