Anda di sini

JTS mujur ngatur Randau pasal pengawa nyukat tanah NCR sitak Ulu Paku, Spaoh

Advertisement

BETONG: Opis Tanah enggau Survei (JTS) Betong sekali agi ngatur Randau bekaul enggau pengawa nyukat tanah NCR ba sitak Ulu Paku, Spaoh begulai enggau mensia mayuh ke nguan sitak nya begulai enggau mensia mayuh ari Penom, Lubok Klampu, Meroh enggau Nanga Paun apin lama ke udah.

Penguasa Tanah enggau Survei Betong Anthony Aboi (gambar) madah, pengawa nyukat Tanah Komunal Bumiputera (NCR) ukai pekara baru tang udah diberi kelala enggau Inisiatif Baru NCR ti dipadahka Perintah ngambika pengawa ngeluarka pala tanah ulih digaga enggau jampat sereta muntang.

“Dalam pekara tu, Perintah nadai ati deka ngambi tanah rayat, tang deka mantu ngemansangka tanah ke enda dikereja ngambika ulih pulai nyadi penguntung ke rayat menua pesisir.

“Berindik ari nya, kena ngamatka peneka tu sereta kerejasama ari tiap renggat mensia mayuh kelebih agi sida ke bempu tanah NCR berat endar ngambika Perintah nengah Opis Tanah enggau Survei (JTS) ulih nyapai pemujur nya manggai 2015,” ku iya.

Ku iya, sitak NCR Ulu Paku udah disukat perimeter baruh Atur Keterubah Inisiatif Baru NCR nyengkaum pemesai tanah urung 4,142.6 hektar, iya nya sitak Beduru, Matop, Tanjung, Kerangan Pinggai, Samu, Jukun, Spuna, Ng. Bong, Danau, Senunok, Penom, Meroh Klampu, Meroh Paun, Lempaong, Linggit, Udau, Sg. Rian, Engkerbai, Nanga Nanam enggau Nanga Jitu, Paku, Spaoh.

Iya madah baru, sitak nya udah dikelai nengah Swk. L.N. 6 kena 12 Februari 2012 nyadi ‘Rezab Komunal Bumiputera (Pengawa Betanam Betupi) baruh Genteran tusun Ukum seksyen 6 Kanun Tanah Nengeri.

“Ke pemun mansang ngagai Atur Kedua Inisiatif Baru NCR, JTS udah ngatur randau begulai enggau sida ke ngempu tanah NCR ari sitak nya.

“Entara tuju bukai, iya nya deka madah ngagai sida, Perintah nengah JTS, Betong deka bejalaika pengawa nyukat lot seiku-seiku dalam sitak perimeter NCR Ulu Paku ti udah dikelai,” ku iya.

Sama bisi ngulu atur pengawa nya, Pemesai Opis Pelilih Mit Betong Friday Belik, Pemesai Menguasa Sitak Pelilih Menua Mit Spaoh Bujang Ladi, Pemesai Opis Tanah ari Opis Menteri Pemansang Tanah Sarawak Thadius Ling, Pemesai OpisTanah di JTS Betong David Laeng enggau Puan Betty @ Siti Nanggai, Juru Ukur di JTS Betong Bakeri Samsuddin, Tuai Rumah Wilson Bekir sereta mensia mayuh ari 4 buah rumah panjai.

Advertisement