MIRI: Peranak rumah panjai ke dituntung penusah angus di Niah majak nerima bantu atas penyiru enggau penyinu mensia mayuh.
Apin lama ke udah, Seksyen Nephrology ari Sepital Miri udah nyaup sida ke tasah nya nengah pengawa meri bantu ti disuaka Sister Jessie Joti ngagai SAO, Boniface Ipat ba opis iya ditu.
Ipat nangkanka nya lalu nyuaka bantu nya ngagai peranak rumah panjai ke dituntung penusah angus, kena April 24 nyin tadi.
Bisi 280 iku ari 35 ruang bilik ke nguan rumah panjai ke digaga ari kayu di Sungai Marusa, ulu entigis Suai Niah, nadai endur diau, ke alai ba penusah nya mega bisi naban seiku nyawa. Iya ke parai nya seiku orang ke timpang pendiau ke beumur 48 taun.
Lebuh penusah nya nyadi kena tengah malam, nadai utai ulih diselamatka sida laban tebal agi ari peranak rumah panjai benung tinduk magang.
“Pekara ti balat ngenyinuka ati iya lebuh seiku indai tuai ke beumur 80 nadai kekakang ati nempuh api ke benung mau ti ngujungka iya balat endar betu ba sebelah tubuh,” pia ku Ipat madah ngagai The Borneo Post enggau ati ke sinu.
Penatai Ipat enggau sida seraban ari opis iya lebuh ngabas peranak rumah nya, udah disambut Tuai Rumah enggau Kaunsilor Akai Anggat.
Berebak enggau nya, sesapa ke bisi penyinu sereta deka nyuaka bantu tau betefon sereta besemaya enggau Akai nengah lumur 019-4871867.
Chara bukai kena ngenataika bantu sekalika ba mata duit tauka barang tau disuaka ngagai Ipat ba Seksyen Pengawa Rama, di Opis Resident ditu.
“Ngarika Akai enggau semua peranak rumah panjai ke dituntung penusah nya, kami meri terima kasih ngagai semua orang ti udah nyaup sereta mantu sida ngelempungka tating pengidup,” ku Ipat.
“Kami mega arapka mayuh agi orang datai mantu sekalika ngena mata duit tauka barang bukai,” pia ku iya baru.