MIRI: Parti Sa’ati Rayat Sarawak (SUPP) ba renggat indu parti bedau nerima surat ari Dato Sri Wong Soon Koh ti madahka iya ningkilka diri ari parti nya.
Presiden SUPP, Tan Sri Datuk Peter Chin Fah Kui madah, pemutus Wong enggau tiga iku kaban SUPP bukai ke tama Parti Tenaga Rakyat Sarawak (TERAS) udah ngelanggar polisi parti Barisan Nasional (BN).
“Aku minta semua ketuai BN nitihka kontitusyen BN, ke alai semua setuju enggau pemutus nerima parti tauka organisasyen politik ke dalam BN.
Lebuh kitai ngaga pemutus, kita semua patut nitihka polisi sepenemu enggau pemutus nya sekalika ba tikas nengeri tauka perintah besai,” ku Chin madah ba aum media ba opis SUPP Miri malam kemari.
Iya irauka parti BN deka nyadi lemi enti sema polisi ke ditanggam parti BN ngelama tu enda dititihka.
Polisi nya amat dipebasaka parti SUPP ke mega parti politik ti kelima pemadu tuai kenyau sida begempung enggau BN dalam taun 1960.
“Tu mih maya ke pemadu mar ditapi politik di Sarawak. Terengganu udah mutarka pekara politik sida, lalu diatu datai ba gintir nengeri Sarawak,” ku iya.
Ku Peter Chin, Komiti Kereja Indu Parti (CWC) deka dalam timpuh dua hari agi berandauka pekara nya.
“Asai aku, kami deka mansik pengamat sida udah tama sereta nyadi kaban TERAS. Ungkup Wong Soon Koh, taja pan iya bedau ningkilka pangku pengawa iya, tang iya udah madahka pemutus diri nyadi kaban TERAS,” ku iya.
Kena 15 Mei tu tadi, Wong ke mega Chairman SUPP Sibu enggau Presiden Parti Progresif Demokratik Sarawak (SPDP), Tan Sri William Mawan udah ningkilka diri ari parti sereta tama parti TERAS.
Tiga iku kaban SUPP bukai iya nya ADUN Bengoh, Dr Jerip Susil, Dr Johnical Rayong (Engkilili) enggau Ranum Mina (Opar).