SIBU: Pemutus Chairman Parti Sa’ati Rayat Sarawak (SUPP) Pampang Sibu Dato Sri Wong Soon Koh masuk ngagai Parti Tenaga Rayat Sarawak (TERAS) deka ditunda semua raban Unit Bumiputera SUPP Pampang Sibu.
Chairman unit tu, Andrew Shilling madah, semua raban sida sebedau tu kala besemaya semampai nyukung Wong baikka bela nyemerai tauka bela tenggelam.
“Kami deka nunda singkang Wong masuk ngagai parti TERAS,” pia ku iya maya dikerandau, kemari.
Andrew ti mega Sekretari Politik Kepala Menteri mega madah, semua raban unit Bumiputera di peransang masuk ngagai parti TERAS.
Kelimpah ari nya ku iya, unit sida deka ngatur aum kena hari Satu tu nentuka kuing sida nangkan ke tu.
Unit Bumiputera SUPP Sibu diatu udah bisi 4,649 iku raban.
Kilah ensana, Chairman SUPP Sibu Dato Sri Wong Soon Koh ngaga pemutus ningkilka diri ari parti penudah ke udah lama enda sepenemu enggau Presiden SUPP Tan Sri Peter Chin ti enggai bebaik enggai iya.
Kelimpah Wong, bala pengari rayat SUPP ke bukai bela nunda singkang iya baka Dr Jerip Susil (ADUN Bengoh), Dr Johnical rayong (ADUN Engkilili) dan Ranum Mina (ADUN Opar).
Pemutus ke sebaka mega digaga Presiden Parti Progresif Demokratik Sarawak (SPDP) Tan Sri William Mawan enggau lima iku pengari rayat SPDP ke bukai bela masuk TERAS.
Lima iku pengari rayat ke bukai iya nya Datuk Peter Nansian Ngusie (ADUN Tasik Biru), Datuk Sylvester Entri Muran (ADUN Marudi), Paulus Palu Gumbang (ADUN Batu Danau), Rosey Yunus (ADUN Bekenu) enggau Ahli Parlimen Baram, Anyie Ngau.
ADUN Pelagus ari Parti Pekereja Sarawak (SWP) George Lagong mega nunda singkang ke sebaka.