KUCHING: Pengeregas, pemerani enggau penyikar pekara ti patut dikemeratka raban opis pengerara api enggau penyah penusah (BOMBA) kena napi peminta servis nyelamat ti majak mayuh.
Direktor Opis Pengerara Api enggau Penyah Penusah Malaysia Nengeri Sarawak (JBPMNS) Nor Hisham Mohammad madah, berindik ari pekara nya opis Bomba deka nentuka raban bomba nyereta Peresa Pengeregas Fizikal Sesiku.
“Kitai raban bomba patut ngembuan pengeregas enggau penyikar laban servis ke diberi ngagai mensia mayuh begunaka peminta tinggi dalam pekara nya (pengeregas enggau penyikar).
“Raban bomba patut ngena pemerani ti dipelajar maya belatih ba palan latih enggau di balai,” ku iya.
Hisham bejaku munyi tu lebuh ke dikerandau pengarang berita pengudah Nutup pekit Kawad Kecekapan Operasi Kebombaan Peringkat Zon Selatan 2014 ti diatur ba Indu Opis JBPMNS ditu ensanus.
Nitihku iya, taun nyin kemari dalam puku rata 91 peratus enti nitihka skema lama tang enti nitihka modul baru ti tegap agi, Sarawak semina ngerikutka 42 peratus.
Iya madahka modul baru nya diambi ari menua Jepun, Singapura, United State enggau United Kingdom.
“Kena nentuka nengeri tejapaika 50 peratus minima ujung bulan Jun tu, tiap buah balai enda tau enda ngatur latih sereta pekit pengeregas enggau penyikar raban bomba.
“Kelimpah ari nya, kami arapka juluk bulih poin 60 peratus ti udah detapka dalam ISO.
“Kami deka numbuhka organisasi ti beratka gaya tubuh enggau pengeregas, peneras enggau penyikar raban Bomba,” ku iya.
Berebak enggau tu iya ngarapka JBPMNS teulihka penyulut dalam pekit Kawad Kecekapan Operasi Kebombaan Tikas Nasional ti diatur 15 Ogos tu ila.
Dalam pekit nya, Zon 1 Sarawak, Kuching udah dipilih nyadi champian ba semua pekit nya.
“Kitai arapka taun tu, kitai ulih ngerampas baru penuduk lumur satu ari Selangor,” ku iya.