Dikarang Rengenyan Labang
KUCHING: Pemintar Kepala Menteri Tan Sri Datuk Amar Adenan Satem endang dipechaya ulih mutarka penanggul politik di nengeri tu, nyengkaum bekaul enggau Parti Tenaga Rakyat Sarawak (TERAS).
Sapit Presiden Parti Pesaka Bumiputera Bersatu (PBB) Datuk Patinggi Tan Sri Alfred Jabu Anak Numpang (gambar), mega pechayaka Adenan ngemeratka pemaik enggau pengelantang menua sereta rayat lebuh ngaga pemutus.
“Diatu kitai nyerah ngagai pemintar Kepala Menteri (Adenan), aku pechaya iya ulih napi sereta mutarka pekara tu seraya ngemeratka pemaik, pengelantang sereta enda ngeruga pemansang Sarawak.
“Baka ti udah didinga maya aum Kunsil Nengeri ensanus, kami nyukung nama pemutus iya (Adenan) ngambika nya pulaika pengelantang enggau pemaik nengah kerejasama ari rayat Sarawak sereta ke pemansang ti manah agi jemah ila,” ku iya ke mega nyadi Sapit Kepala Menteri.
Jabu mansutka pekara nya lebuh dipinta raban pengarang berita meri penerang bekaul enggau parti Teras, pengudah nyadi chairman aum Hari Nyambut Pengabang Gawai Dayak 2014 di Wisma Bapa Malaysia ditu kemari.
Dalam riput surat kabar kemari bisi madah, kena ngetuka penyarut ti nyadi dalam parti SPDP enggau SUPP, beberapa iku pengari rayat ari kededua parti setuju beserakup dalam Parti Tenaga Rakyat (TERAS) berengkah ensanus.
Kena ngetanka penuduk sida nyadi pengari rayat Barisan Nasional (BN), TERAS ti udah direjister enggau Opis Pengerejister Gerempung (ROS) kena 28 Ogos 2013, nangkanka nya sida deka minta parti nya nyadi sebuah parti komponen tauka dikumbai ‘BN Plus’.
Nambahka nya Jabu madahka pekara ti sama kala nyadi kelia maya SPDP ditumbuhka ti ngujungka udah nya SNAP dikinsil.
“Pekara ti kala nyadi suba diatu nyadi baru. Tu nyadi sebengkah agi ulah sida ti pechayaka BN Nengeri deka nyukung sida. Diatu gaya politik udah berubah,” ku iya.
Jabu ti enggai ngenang panjai sentang pekara nya madahka diri semina arapka pengamat penerang ti dibantaika raban nya nengah surat kabar enggau media elektronik.
“Aku semina bepanggai ngagai riput surat kabar. Aku enggai meri sebarang komen lebih, kitai meda dulu. Aku ngasaika manah agi kitai meda timbal ari mensia mayuh dulu.
Pengari rayat ti nyadi kaban TERAS iya nya presiden SPDP Tan Sri William Mawan Ikom, Kaban Kunsil Nengeri (ADUN) Tasik Biru Datuk Peter Nansian, ADUN Marudi Datuk Sylvester Entri Muran, ADUN Batu Danau Paulus Palu Gumbang, ADUN Bekenu Rosey Yunus enggau Kaban Parlimen Baram Anyie Ngau.
Kelimpah ari nya, Dato Sri Wong Soon Koh ti kala nyadi Chairman SUPP Sibu sereta ari parti SUPP ke bukai baka ADUN Bengoh Datuk Dr Jerip Susil, ADUN EngkililiDr Johnichal Rayong Ngipa, enggau ADUN Opar Ranum Mina sereta ADUN Pelagus George Lagong ari Parti Pekerja Sarawak sama bela setuju berakup dalam parti baru nya.