Dikarang Chris Bishop
KUCHING: Sapit Presiden SUPP Datuk Richard Riot Jaem mengkang dalam parti, ngarapka pintu nya mengkang ditelenga jemah ila seraya madahka diri lantang ba penuduk iya ke diatu.
Nyaut tanya ba siti aum pengarang berita ke diatur di Bilik VIP, Palan Penyangkai Bilun Entarabansa Kuching (KIA) kemari, Riot madah pemutus ADUN Bawang Assan Dato Sri Wong Soon Koh enggau tiga iku ADUN SUPP ke bukai ti nyereta TERAS patut dipebasa.
“Aku enda ulih nyakal pemutus sida empat ti udah masuk TERAS. Aku milih enda bejurai panjai sentang pekara tu lalu semua pemutus udah tu dilempai ngagai presiden SUPP Tan Sri Peter Chin.
“Soon Koh enggau tiga iku ADUN ari SUPP ke bukai udah ngeletakka pemutus diri, lalu aku bebasaka pemutus nya,”ku iya ke mega Menteri Pengereja Pengawa.
Sekalika aku lantang ati tauka enda ba sentang pemutus nya ukai pekara ke berat, sereta enda ibuh dipejurai ditu, tandu iya.
Nyaut tanya pemberita sekalika iya deka nitihka singkang Soon Koh nyereta TERAS munyi ti dikejaku, Riot ke mega kaban Parlimen Serian madah iya nadai nerima sebarang kangau ari TERAS naka ke diatu.
Taja pia, Riot ngarapka pintu nya mengkang ditelengaka jemah ila seraya madahka diri deka meraka jematan (ngalih) ba maya ke patut.
“Aku diatu lantang mangku pengawa nyadi menteri pengereja pengawa dalam kabinet Menteri Besai Datuk Seri Najib Tun Razak.
“Aku temegah nyadi ketuai ari raban bansa Bidayuh ti keterubah mangku pengawa menteri penuh, lalu deka nentuka semua pangku pengawa nya dipejalai enggau manah,”ku iya.
Ba siti aum pengarang berita ke diatur di Bilik Media pengudah tembu Aum Dewan Undangan Nengeri (DUN) Hari Empat tu tadi, Soon Koh enggau ADUN Bengoh Dr Jerip Susil, Adun Opar Ranum Mina sereta ADUN Engkilili Dr Johnical Rayung ngambi pemutus ningkilka diri ari SUPP lalu nyereta TERAS.
Sida empat niitihka singkang Tan Sri William Mawan ti ningkilka diri ari nyadi presiden SPDP lalu nyereta TERAS. Kaban Parlimen Baram Anyie Ngau mega bela nitihka singkang Mawan.
Bala ketuai bukai dalam TERAS iya nya raban G4 SPDP, ADUN Marudi Datuk Sylvester Entrie, ADUN Batu Danau Paulus Palu Ngumbang, ADUN Bekenu Rosey Yunus.
Nambahka nya, ADUN Pelagus George Lagong disadang bela nyereta TERAS ke alai dua iku ADUN ari PKR diberita deka nitihka singkang George.