KUCHING: Penanggul berumah ba genturung ti enda dikemendar udah nurun 23 peratus iya nya ari 9,000 ngagai semina 7,000 buah aja diatu, di nengeri tu.
Menteri Pengawa Berumah Datuk Amar Abang Johari Tun Openg madah, ari 9,000 sebedau tu, diatu penyampau nya nurun ngagai 7,000 buah aja.
“Kandang 2 ngagai 3 taun tu, perintah udah ngurang naka 23 peratus, reti nya perintah nemu isu berumah ba tanah ti enda dikemendar.
“Penanggul berumah enggau nadai pemendar ba tanah perintah nengeri enda sebaka enggau tanah peribit.
“Isu berumah enggau nadai pemendar ba tanah perintah muntang agi diputar tang tanah peribit, nya entara sida ke berumah enggau kompeni nya empu,” ku iya.
Ba debat ADUN Pujut Miri, Fong Pau Teck ke madahka perintah enda beratika isu setinggan di Miri, Abang Johari nyaut: “Penanggul rumah setinggan tu mega disengkaum enggau penanggul setinggan di Miri ke mayuh udah kurang. Taja pan enda ulih diputar tekala nya laban isu setinggan tu enda muntang diputar,”, ku iya.
Iya mega nandu Atur Setinggan Menua iya nya bekal karan enda diberi ngagai sitak setinggan.
Iya madah baka nya ba aum media pengudah mantaika simpul jurai Aun Kunsil Nengeri ti Ke-17 ditu, ensanus.
Ba debat ADUN Batu Lintang, See Chee How ke nanya pasal ‘Perambu Mutarka Penanggul Setinggan’, ku Abang Johari, bisi lima Projek Perumahan Rakyat (PPR) udah disuwa ti digaga di Sarawak sepemanjai 10 taun tu ke mungkur 3,016 unit.
Lalu ari penyampau nya, urung 799 unit udah endur ruang bilik setinggan (26.4%) diau, ku iya.