SRI AMAN: Pasar Bena Malaysia, Sri Aman udah sedia nerima penatai temuai ari dalam enggau menua tasik ke deka datai ngulu Pesta Bena Sri Aman 2014, ke berengkah ari sehari tu (16 Mei) nyentuk ke Hari Minggu tu ila.
Residen Bagi Menua Sri Aman ke mega Chairman Komiti Pengatur Pengerami Bena Sri Aman 2014, Jonathan Lugoh madah, sida udah tembu endar nyendiaka diri kenyau ari kemari.
“Kami semina nganti penatai bala temuai ari enggau menua tasik ke datai kitu begulai enggau peranak menua Sri Aman ngerami pengerami nya ke diatur ngelama tiga hari berunggu,” pia ku iya madah ngagai Utusan Borneo sepenembu ninjau pengawa nyendiaka diri ke penudi endar, ba Tebing Sungai Batang Lupar ditu pagi kemari.
Ku iya baru, sida melabaka urung 80,000 iku datai ngulu pengerami nya, enti dibanding enggau taun seiti nyin kemari ke nyauka manggai urung 70,000 iku.
“Kami arapka, nengah publisiti ti dipejalaika sebedau tu, ulih nyapai penyampau ti di keinginka kami,” pia ku iya.
Utusan Borneo ke mega media penyadung penerang pengerami nya taun tu, lebuh ke matau pengawa nyendiaka diri pagi kemari, benung kiruh dipejalaika.
Baka nya mega Bazaar Ria Pesta Bena ke bisi muka lebih 200 buah palan bejualka mayuh macham bansa barang nyengkaum bejualka pemakai enggau ai irup udah balabuh bejual kena ari Hari Tiga tu tadi.
Pengerami tu deka dipenyadika Sapit Kepala Menteri Sarawak, Datuk Patinggi Tan Sri (Dr) Alfred Jabu Anak Numpang kena 17 Mei, pukul 10.30 pagi ba Tebingan Sungai Batang Lupar, Sri Aman, Sarawak.