KUCHING: Marcela Peter, 15, ti udah lima hari nadai pulai ke rumah sereta enda temu penunga enggau kebuah ngirauka ati apai enggau indai iya.
Penyadi nya udah diripot ngagai opis polis Hari Enam, 10 Mei ba hari ke sama pekara nya nyadi, Marcela nadai pulai ke rumah tembu kelas tambah di Sekolah Menengah Matang Hilir ditu.
Laban ti kelalu irau, indai iya Nyawos Jihem minta tulong pengelenyau anak iya ditabur nengah surat kabar.
Apai iya, Peter Gatey lebuh dikerandau ba rumah iya di Taman Malihah Hari Dua tu tadi madah, sida udah suah betanya penunga ngagai bala bakih anak iya tang sida nadai nemu tauka meda kini penunga (Marcela) tembu kelas tambah nya.
“Urung pukul 6.00 pagi 10 Mei aku enggau bini aku nganjung Marcela ngagai sekula lalu pukul 11.15 pagi kami duai ngambi iya ngagai sekula nya.
“Tang nyentuk ngagai pukul 1.00 lemai iya lalu nadai udah pansut lalu kami terus betemu enggau pengajar kelas anak aku.
“Nitihku pengajar kelas nya, anak aku endang bisi dalam kelas maya belajar enggau pansut maya udah tembu belajar,” ku iya ti gawa nyadi polis di pampang komunikasi IPD Kuching.
Kelimpah ari nya, menyadi iya Grace madah, sebedau penusah nya nyadi, adik iya nadai ngayanka penyelai, sereta surat pesan pandak enggau pekara ti ngeruga bekaul enggau penusah pan nadai.
“Kami enda nemu nama kebuah iya lenyau laban ngelama tu iya nadai ngayanka ulah ti nyelai tauka ulah ti ngirauka ati.
“Aku udah ngiga sereta meda barang iya baka facebook, twitter enggau ke bukai tang nadai sebarang penerang ti ulih dikait enggau pengelenyau iya,” ku Grace.
Enda ngira nama tegal anak sedaui iya lenyau ngenyit nya, Nyawos enggau laki sereta sida sebilik ngarapka Marcela pulai ngagai sida enggau likun.
Berindik ari pengirau ke pengelenyau nya, apai indai Marcela minta tulong orang mayuh madah ngagai sida nyema bisi tepedaka anak seduai .
Hari ke penudi Marcela dipeda ngena baju bekolar kuning, betanchut chelum enggau kasut sukan chelum.
Bekulit kuning lensat enggau peninggi 5 kaki 2 inchi Marcela bisi kelai tai lalat ba kuyu kiba iya.
Seberang penerang bekaul enggau tu orang mayuh tau telefon ngagai sida sebilik ba lumur 082-640114 tauka 013-8368594 tauka telefon terus ngagai Sarjan Rivender ba lumur 014-2805100.