Dikarang Jacqueline R. David
enggau Chris Bishop
KUCHING: Nitihka Adat Iban diatu, belanja pengintu pengelantang pendiau ke anak bini ti disarak enda besai bayar sereta setipak enggau gaya pengidup ke diatu.
Sapit Kepala Menteri Datuk Patinggi Tan Sri Alfred Jabu madah, Majlis Adat Istiadat Sarawak (MAIS) diatu benung dalam perambu deka ngubah Adat Iban 1993, nyengkaum penyampau bayar tauka ganti rugi sereta bayar ngibun anak nitihka deklarasyen Ordinan Adat Asal 1966.
Bekaul enggau pekara pengurang penyampau majistret Kot Bansa Asal Pelilih Menua enti dibanding enggau pemayuh penyampau kes tanah NCR ke bedau diputarka, iya madah perintah beratika pekara nya sereta deka mutarka pekara nya enggau jampat.
“Perintah diatu benung ngambi mayuh agi majistret Kot Bansa Asal Pelilih Menua. Enti nitihka, kami udah bisi majistret ke bisi peneleba di ati kami, lalu pengawa ngambi majistret nya gawa sama bela deka diputarka,” ku iya.
Ba atur deka ngambi mayuh agi ketuai raban bansa, iya madah Residen nengah Opis Residen Bagi Menua patut nganjung surat perambu minta ketuai raban bansa sereta meri penerang ke silik kebuah sida nya beguna endar, ngambika perintah ulih berundingka pekara nya, pia ku iya.
Kelimpah ari nya, Jabu madahka perintah menua nemu pengawa ex-kaban komunis ke nguji deka ngidupka baru idealogi pasal komunis di menua tu.
“Ex komunis ke diatu mayuh udah tuai lalu enda regas agi ngerembaika penemu komunis sida.
“Taja pia, perintah beratika pekara tu enggau silik kelebih agi dalam pekara pengelikun sereta pengelantang pendiau di menua tu. Perintah deka terus mansik semua pengawa ke tau ngeruga pengelikun menua enggau penyerakup bansa di menua tu nyengkaum pengawa ‘subversif’ enggau ‘militan’,” ku iya.
Iya bejaku munyi tu lebuh ke nyaut tanya ari Kaban Kunsil Nengeri (ADUN) Krian, Ali Biju, ADUN Kedup (Martin Ben), ADUN Engkilili (Johnichal Rayong), ADUN Lingga (Simoi Peri), ADUN Balingian (Yussibnosh Balo), ADUN Ngemah (Alexander Vincent), ADUN Nangka (Dr. Annuar Rapaie), ADUN Lambir (Ripin Lamat), ADUN Batu Danau (Paulus Palu Ngumbang) enggau Bukit Kota (Dr. Abdul Rahman Ismail) lebuh ke nutup jurai aum Program Transformasyen ungkup Minoriti Bansa Asal di Sarawak enggau Sabah, Opis Perintah Sarawak, Ketuai Komuniti enggau Ketuai raban bansa, Pengelikun enggau Adat Iban ba Aum Kunsil Nengeri ke-17 ditu, kemari.