PALAN PEMANSANG, PANSIK BANSA ASAL: Jabu seduai Menteri Wang Kedua Dato Sri Wong Soon Koh baru datai ngagai Aum Kunsil Nengeri ti Ke-17, ba hari ke penudi DUN seharitu (kemari).
KUCHING: Kompleks Kot Bumiputera enggau Majlis Adat Istiadat Sarawak (MAIS) diatu benung digaga sereta dijangka tembu ujung bulan September 2014.
Sapit Kepala Menteri Datuk Patinggi Tan Sri Alfred Jabu madah, kededua kompleks nya ke berega RM40 juta ba sebengkah palan pemesai 15 ikar di Pentagon Kota Samarahan.
Ku Jabu, Perintah Besai nengah Lab Bumiputera di baruh Program Transformesyen Perintah (GTP) nyendiaka belanja lalu Perintah nengeri nyendiaka tanah endur kededua kompleks nya digaga.
Kompleks baru ke digaga nya mandangka Perintah nyukung bansa asal menua tu ba pengawa ngemansangka menua. Iya mega mandangka kelai kaul kerejasama entara Perintah Nengeri enggau Perintah Besai Barisan Nsional (BN),” ku Jabu.
Iya madah munyi nya lebuh nyimpul jurai Aum Kunsil Nengeri ti Ke-17 ditu, kemari.
Tukuh kededua kompleks tu ngayanka arkitektur motif bansa asal menua tu, lanskap flora enggau sekeda pekara bekaul enggau adat pesaka bansa asal, kelimpah ari pemisi perengka guna ICT moden nitihka singkang moden kemaya hari tu.
Nambah ke nya, dijangka palan nya ila tau nyadi palan pansik adat pesaka.
Tu laban literature sereta tulis dalam sekeda pansik ti bisi ditemu sereta dokumen bukai bekaul enggau komuniti bansa asal deka disimpan ba arkaiv ke deka digaga jemah ila,” ku iya.
Kelimpah ari nya, palan nya mega deka dikena nyadi palan latih ungkup sekeda kategori pemesai ke ngereja pengawa adat sereta main asal. Pemesai nya nyengkaum Majistret Kot Bansa Asal, Opis Perintah, Ketuai Komuniti enggau Ketuai Raban Bansa,” ku iya.