Anda di sini

KM ngenukuka Ukum Hudud enda dikena di Sarawak

Advertisement

KUCHING: Kepala Menteri Tan Sri Datuk Amar Adenan Satem ngenukuka Ukum Hudud enda dikena di nengeri tu lalu ngansak parti penyakal, DAP badu betalatka pekara nya agi.

“Aku deka nerangka enggau silik  Ukum Hudud enda deka dikena di Sarawak lalu nuju Kaban Kunsil Nengeri Ba’Kelalan, bup kudus enda dirampas di nengeri tu.

“Aku enda ulih bejaku ngarika menua Malaysia tang aku meri ngenukuka pekara tu ungkup Sarawak,”pia ku iya maya nyimpul jurai Aum Kunsil Nengeri (DUN) ba hari penudi aum kemari.

Bedau sempat Adenan nampung jaku simpul iya, Kaban Kunsil Nengeri Kota Sentosa ke mega Chairman DAP Chong Chieng Jen angkat lalu bejaku ngansak Adenan ngenataika jaku lalau nya ngagai SUPP.

Ba kaul bukai, Adenan madah perintah nengeri deka ngeluarka chek RM1 juta dikena mantu mayar ungkus berubat ADUN Bukit Asek (DAP) Wong Ho Leng.

Bantu nya disetuju perintah nengeri pengudah nerima surat ari Chong. Ungkus berubat Wong Ho Leng ke benung diperubat ba siti sepital di Singapura udah manggai RM1.4 juta nyentuk ke diatu.

Chong angkat baru lalu meri jaku terima kasih ngagai Adenan enggau perintah nengeri ketegal bantu nya.

Advertisement