KUCHING: Perintah nengeri udah ngemendarka belanja sepenyampau RM62.78 juta ungkup taun 2014 ngambika diagih ngagai 23 buah opis kunsil kandang menua di nengeri tu.
Pekara nya dipadahka Menteri Kunsil Kandang Menua enggau Pemansang Raban Bansa Dato Sri Wong Soon Koh maya nyimpul jurai opis menteri iya maya baum Kunsil Nengeri kemari.
“Sepenyampau RM62.78 juta ti udah dikemandarka perintah nengeri ke diagih ngagai 23 buah opis kunsil ke dibaruh kuasa opis menteri tu dikena bejalaika 134 projek infrastruktur.
“Projek nya baka ngemanahka jalai, parit, agu mensia mayuh, market, palan pengengkah kereta, balai raban bansa, lorong bejalai kaki, palan pengetu bas enggau dikena ngemanah kereban ‘waste management’” ku iya.
Bejaku baru iya madahka kelimpah nerima geran ari perintah nengeri, opis kunsil kandang menua mega nerima ungkup belanja ari perintah besai dikena ngemanahka jalai alun.
“Ba taun 2014 sepenyampau RM89.9 juta geran diterima ari perintah besai dikena ngemanahka jalai, ngerataka jalai enggau ngemanahka parit ti dipepejalaika nengah Malaysian Road Records Information System (MARRIS),” ku iya.
Kelimpah ari nya opis menteri iya ku Wong, udah ngungkupka belanja RM2.7 juta ngagai opis kunsil kandang menua ngambika bisi dikena ngatur aktiviti tauka program.
Program tauka aktiviti ti diatur nya mungkur raban bansa ngambika ulih ngerapitka kaul rayat enggau perintah.
Dikena ngerapitka agi kaul enggau raban bansa, ba taun 2014 opis menteri iya mega ngagihka belanja dikena ngatur program enggau aktiviti baka lumba enggau main sereta main asal ungkup raban nembiak.