Mayuh peranak menua di Kapit enggau Belaga sereta pengempu ekspres enda lantang ati ke terminal nya
SERABAN PENGANGKUT BARANG: Mandangka pengeringat sereta kelai enda lantang ati ketegal gaya ke nyadi ba terminal Kapit.
KAPIT: Belabuh ari 1 Mei, semua penumpang bot ekspres dikerah Kaunsil Sungai Sarawak (SRB) ngena terminal Kapit laban semina nya penyangkai kapal ke manah di Kapit.
Pengingin ati Kontroller SRB, William Jinep ke deka meda mensia mayuh ngasaika perengkaguna ke manah agi enda tejapai laban terminal Kapit nya mengkang enda menuku sereta tau ngenusahka pengelikun penguna ti bekenaka penyangkai bot nya.
Dipelabaka semina terminal Kapit aja di menua Sarawak ke enda disikap ngena ponton, ke alai ekspres ditanchang ba tisi terminal nya berimbai bererintai enggau ekspres bukai.
Sebedau tu, pemadu nadai pan semina tiga buah ekspres ditanchang begulai, tang nya udah ngenusahka penumpang ke bekenaka ekpress bukai.
Diatu pekara nya balat agi ngenusah laban ekspres ke ditanchang berimbai nyentuk 12 buah enti udah datai ba maya benung kiruh belabuh ari pukul 8.00 pagi nyentuk pukul 12.00 tengahari, ninting hari.
Sebedau tu, semua ekspres ti pulai mansang ari Kapit ke Nanga Ibau, Kapit ke Baleh (Putai, Ga’at), Kapit ke Belaga (Bakun, Belaga, Punan Bah, Nanga Merit, Pelagus) dikerah sangkai ba penyangkai bot Belaga. Ninting hari sida tu bisi 16 kali pulai mansang sehari.
Sebedau tu, terminal Kapit semina bisi nerima penyangkai 8 kali pulai mansang ari Kapit ke Sibu. Diatu, terminal nya bisi 34 kali nerima penyangkai, ti ngujungka terminal nya udu kiruh sereta sekut.
NGENUSAH AJA: Tu meh ke nyadi, lebuh sebuah ekspres nya deka bekejang, ekspres bukai ti nanchang tali ba ekpress nya tadi, enggai enda pan muka tali sida lalu udah nya baru nanchang ba ekspres bukai ke mengkang dia.
Kelimpah ari nya, ninting kali enti ekspres ke semak agi enggau terminal nya deka bekejang, orang ke ngempu ekspres sepiak nya, enggai enda pan muka dulu tali ekspres sida ngambika ulih meri awak ngagai ekspres nya tadi bekejang. Udah nya baru orang ke ngempu ekspres ti bedau bekejang nya nanchang baru tali ekspres sida ba ekpress bukai ke besendi enggau nya. Penguat riak ai ari ekspres ke sangkai tauka bekejang nya mega ngujungka ekpress bukai geguyat, ke alai penumpang ke baru sangkai tauka deka bekejang ti meraka betengahka ekspres nya tauka labuh ke ai.
Pekara nya tadi ngujungka orang ti ngempu ekspres, penumpang enggau orang ti berangkutka barang betapi enggau penusah.
SRB pengamat iya deka ngelantangka orang ti bekenaka terminal nya, tang tu balat ngenusah, ngujungka penguna betapi enggau mayuh agi penanggul bukai.
Seiku orang ti ngempu ekspres ti dikelala enggau nama Tony lebuh baum enggau Kontroller SRB, William Jinap di Opis Pelilih Mit Kapit empai lama ke udah madah, sida enda setuju ke pengawa mindahka penyangkai bot di Belaga ngagai terminal Kapit, tang penemu sida enda dikeibuh sereta dipajak ngena terminal baru nya.
“Maya aum nya, semua kami ke ngempu ekspres ari Baleh enggau Belaga, enda setuju disuruh sangkai di terminal Kapit laban kami meda terminal nya enda chukup likun sereta mega enda teatur. Kami madah munyi nya tang enda dipendingka sida,” ku iya.
Seiku penumpang ke enggau berandau ba penyangkai nya ti dikelala ngena nama Ah Aik ke deka mansang ke Sibu, madah, iya tekenyit endar ati ninga pemutus nya ti enda bejalaika pansik dulu sentang pemaik enggau pengurang ke nyadi ba endur nya.
“Aku ngemeratka pengelikun. Orang ke sakit, orang tuai enggau bala indai ti bebaika anak mit mar deka mindah kin kitu ba penyangkai nya,” ku iya.
Ku Ah Aik, “orang ti ngempu ekspes ari menua pesisir enda patut ditagang ngena penyangkai bot di Belaga ngambika enda besekut dia. Endang amat penyangkai di Belaga nya patut dikemanahka. Perintah patut ngungkupka belanja dikena ngemanahka penyangkai bot di Belaga, ukai nutup iya.”
Seiku agi penumpang ke berandau enggau pemberita ti dikelala enggau nama Ah Kau madah, ngelama tu SRB bejaku pasal pengelikun ba sungai, pengelikun ekspres enggau pengelikun penumpang. Nama reti pengelikun tu deh? Sapa ti enda ibuhka pengelikun? Kami bisi ninga orang teterap lebuh betengahka ekspres sereta mega bisi labuh ke ai.”
Berebak enggau nya, Philip Lim ngarika seraban 30 iku orang ti berangkutka barang udah betemu enggau ketuai opis SRB Kapit, Riyung Barau madahka penanggul ti ditapi sida. Iya mega madah, pemutus ke diambi SRB nya salah lalu minta sida SRB ngena baru atur ke sebedau tu ke alai orang ti ngempu ekspres ari menua pesisir sangkai ba penyangkai bot di Belaga lalu ekspres ari Sibu sangkai ba terminal Kapit.
“Pedis berangkutka barang laban kelalu mayuh ekspres enggau penumpang. Bisi pemerat barang nya manggai ba 100 kilogram sereta pedis deka nginsit dia,” ku Philip.
Seiku penumpang ke benama Lahang ti baru datai ari Belaga minta pemesai SRB mutarka penanggul nya enggau lengkas sebedau bisi pekara ti enda manah nyadi. Iya mega minta pengari rayat nyaup mutarka penanggul nya.
Seiku agi penumpang ke benama Agus ti baru datai ari Baleh minta raban bekuasa datai kia, berati sereta mendingka sebana ari bala penguna terminal nya, laban sida nemu agi utai ke manah ba sida.
Ketuai opis SRB Kapit, Riyung Barau madah, dalam aumke diatur ba Opis Pelilih Mit Kapit ti bechairmanka Kontroller SRB, William Jinap ke digulu sekeda bala ketuai opis perintah nyengkam polis, Sekretari Opis Pelilih Mit Kapit,Yong Ing Chu, Sapit Residen, Zul Usop pemesai BOMBA IrrwandyTugor enggau orang ti ngempu ekspres, sama bela setuju enggau pemutus ke minta semua operasyen ekpress ba penyangkai di Belaga dipindah ngagai terminal Kapit ngambi ulih ngasaika perengkaguna ti disediaka dia.
Aum nya mega diatur kena nyemaka penyampau bayar servis ke dipinta orang ti ngempuka ekspres.
Sama bela bisi ngulu aum nya orang ti ngempu kompeni ekspres baka Sinar Shipping Group (Tony Kong), Asian Vision Group (Ah Ping), Shun Shun (Tuai Rumah Ikau) enggau Punan Bab (Stanley Tukang).
Orang ti ngempu ekspres arapka SRB ulih mutarka penanggul nya tauka ngena baru sistem ke sebedau tu kena ngurangka penyekut ke nyadi ba terminal Kapit nya.