Anda di sini

Kami ngenuluka jali kena berumah panjai ngagai peranak menua ti dituntung penusah angus

Advertisement

KUCHING: Jali duit kena berumah panjai deka dikelengkas sereta ngemeratka sida ke betapi enggau penusah angus.

Menteri Pengawa Berumah Datuk Amar Abang Johari Tun Openg (gambar) madah, naka ke diatu kes rumah panjai ke angus bisi 40 buah ke mungkur 1,096 pintu udah diberi duit jali Opis Pemansang Pengawa Berumah (HDC), lalu penyampau nya dalam RM10.48 juta.

“Opis Menteri kami benung mansik perambu deka nambah penyampau duit jali ke ulih diinjau nengah skim tu lalu ngambi kira sekeda pekara ke bekaul enggau nya. Perambu tu mega patut dipesetujuka  Opis Menteri Wang (KKM),” ku Abang Johari.

Iya madah baka tu lebuh nyimpul jurai Aum Kunsil Nengeri ti Ke-17 sereta nyaut tanya ari Kaban Kunsil Nengeri (ADUN) Krian, Ali Biju bekaul enggau rumah panjai angus minta duit jali nya.

Ba aum media nangkan nya, iya madah duit jali Skim Rumah Panjai (SRP) ke ditu semina diberi dalam Rm10,000 aja tang opis menteri nya berunding deka nambahka penyampau lun ngagai RM20,000 laban beratika barang ke kena ngaga rumah majak mar.

“Nya alai, agi nganti KKM ngemendarka lun tu ditambah ngagai RM20,000 ila laban enti kitai beratika rega barang kena ngaga rumah pan majak niki, sigi patut iya ditambah.

“Ba penusah rumah panjai ke angus, kami deka beratika struktur nya dulu, lalu deka ngelalau mensia mayuh ke diau di rumah panjai bakani deka ngaga rumah panjai ke manah, ngambika enti angus pan, rumah panjai nya agi bisi ‘Fire Breaker’,” ku iya.

Menteri Muda Pengawa Ngaga Rumah, Datuk Francis Harden lebuh dikerandau madah, naka kediatu bisi 567 rumah panjai di menua tu (nitihka pansik ari 1976-2013) lalu kos ke dikena lun tu mungkur urung penyampau RM87 juta.

“Sigi mayuh ke minta lun tu deka ngaga rumah panjai baru. Nitihka statistik, peminta ke agi nganti bisi dalam 680. Timbal sigi manah, semina kami nadai chukup belanja, lalu ngarapka taun tu bulih,” ku iya.

Ba tukuh rumah panjai baru, iya madah semua  nya nitihka  konsep baru ke dikumbai Skim Rumah Panjai Mesra Rayat (SRPMR), ti digaga HDC.

“Tang enti sema sekeda rumah panjai enda setuju enggau tukuh nya, sida tau betemu enggau arkitek HDC. Buka dalam 18 kaki tang panjai, bilik bisi tiga buah, dapur, bilik mandi, agi.

“Enti dudi hari deka nyambung rumah bilik nya ila, sida iya ulih nyambung pemesai bilik nya. Enti sida iya setuju enggau tukuh nya, sida iya tau berandau enggau komiti,” ku Francis ke mega nyadi chairman komiti tu.

Advertisement