Anda di sini

Apai indai anang enda liat ati nentuka pemujur pelajar anak diri

Advertisement

BETONG: Tanggungpengawa ngajar bala anak ukai semina dilempai ba pengajar aja, tang apai indai enggau penyaga patut bebendar agi nentuka pemujur pelajar anak sida.

Tanggungpengawa nya patut dipangku kededua piak, pia ku Menteri Kebun Dandang Besai enggau Komoditi Malaysia, Datuk Amar Douglas Uggah Embas.

Iya bejaku munyi tu lebuh bejadika Pengerami ‘Permuafakatan Ibubapa, Kakitangan dan Guru’, Sekula Primari (SK) Penom ditu kilah ensanus.

Ku iya, menua kitai diatu benung nyingkang nyadi sebuah menua maju nyerumba taun 2020. Nya alai kitai amat begunaka mudal mensia ke menyana sereta bepelajar.

Uggah ke mega Kaban Parlimen Betong madah,apai indai anang enda seruran nentuka pemujur anak sida ba pelajar, enggaika anak nadai batang pengidup ke meruan jemah ila.

Ku iya, perintah udah bejalaika mayuh bengkah  program pelajar dikena nempa nembiak ke nyulut ba pelajar baka muka librari, meri perengkaguna eletronik enggau internet di sekula, kelai perintah amat ngemeratka pelajar sekula.

Uggah arapka perengkaguna ke diberi nya dikena enggau manah.

Ku iya baru, pengajar ba tiap buah sekula dikearap ulih ngenataika semua penerang nya ngagai bala nembiak ngambika sida ulih ngena semua pemisi nya nengah chara ke betul.

Juluk bukai ke deka dijapai nengah atur program nya nyengkaum nyungkak semua peratus peresa Ujian Pencapaian Sekolah Rendah (UPSR) ngambika ulih manggai ba seratus peratus sereta meransang nembiak ngambi teulihka 5A dalam UPSR 2014.

Uggah mega muji raban sekula nya laban ke udah ngatur sebengkah program ke besai amat reti nyengkaum meri licha peransang ti dikenataika Dr Lambert Lindong ke bejudul ‘School Improvement Partner’ begempung enggau Opis Pelajar Pelilih Mit Betong.

Ku iya, nya meh singkang ke pemadu manah sereta dipejalaika ngena ba maya iya, ukai aja pulaika pemaik nembiak sekula aja, tang apai indai mega patut teulihka penemu ari program nya. Iya mega madahka Kaban Kunsil Nengeri (ADUN) Bukit Saban, Robert Lawson Chuat nadai penanggul nyukung sebarang program ti nguntungka sekula nya.

Uggah mega arapka program ditegapka belama ngambika prestasi sekula nya seruran manah belama.

Nengah awak nya mega, Uggah meri RM 5,000 ngambika bisi dikena meli bup enggau kereban ba librari, sepuluh iti kipas angin ungkup dewan sekula nya enggau seset LCD Projekter,

Bela bisi ngulu pengerami nya,Sapit Pemesai Opis Pelajar Pelilih Betong, Kepala Pengajar SK Penom, Sekreteri Politik Uggah, Dr Richar Rapu, James Digat, Penyelia DUN Bukit Saban, Penyelia DUN Layar enggau Ketuai PIBG SK Penom.

Advertisement