Dikarang Judan Bungap //
Juluk nya dikejampat nengah MRP ari pengari rayat ti seruran nyenguk peranak rumah panjai
SIBU: Pengeranda berumah baru deka diasaika peranak Rumah Baie Bundan di Jalai Oya ditu enda lama agi dikena napi pemayuh mensia ti majak nambah.
Pekara tu mega berita manah ngagai sida serumah nyerumba Hari Gawai ti deka datai alai sida ulih begawai ba rumah panjai baru taun bukai.
Pengerami nasih taba rumah panjai baru nya dipenyadika Kaban Kunsil Nengeri (ADUN) Nangka Dr Annuar Rapaee kena hari Minggu tu tadi.
Ba pengerami tu Dr Annuar madah, iya deka ngenjuk projek mit menua pesisir (MRP) dikena nyaup bala rumah panjai nya ngentak baru.
“Kelimpah ari rumah tu dua buah rumah panjai ba DUN Nangka ke bukai mega diatu benung digaga,” ku iya madah ngagai pengarang berita maya ngulu pengerami nya.
Dulu agi ari nya, Dr Annuar bisi nemuai ngagai semilan buah rumah panjai pegai DUN Nangka beserimbai enggau Hari Gawai ke deka diintu enda lama agi.
Rumah panjai ke ditiki iya sebedau nya baka Rumah Meriam, Rumah Tuah, Rumah Dindang, Rumah Idiaz, Rumah Donny Nyanggai, Rumah Kawau, Rumah Jawin, Rumah Bungkong Amoi sebedau datai ba Rumah Baie Bundan.
Ba jaku iya, Dr Annuar ngelalau peranak rumah panjai ngambika landik ngena belanja nitihka pemisi diri maya Hari Gawai tu.
Berebak enggau tu mega, iya ngambi awak berandau enggau bala dia bekaul enggau penanggul kelimpah mendingka buah penemu rayat.
“Penemuai ti baka tu ulih ngenyemakka aku seraya meretika penanggul ke ditapi rayat lalu berundingka chara ti engkeman mutarka penanggul sida,” ku iya nandu.