Anda di sini

SWP tetap nganjung pengari bediri maya PRN tu ila

Advertisement

KUCHING: Parti Pekereja Sarawak (SWP) besedia deka bediri ngatika diri maya pengawa bepilih nengeri (PRN) tu ila.

Presiden parti nya, Larry Sng madah kemari, iya udah bisi mansutka jaku madahka sida iya (SWP) nadai ati deka betimbal penemu enggau chairman DAP nengeri, Chong Chieng Jen.

“Tang pekara ke dipelajar ari tu, iya nya ukai bansa nya chara deka ngambi kaban parti kami,” ku Sng madah nengah pesan jaku pandak iya ngagai pemberita.

Sng besemaka ngambi kaban parti ari parti bukai, sebengkah pengawa ke enda manah sereta tau ngasuh kitai enda arapka orang nya, ku iya.

“Enti DAP ngasaika sida iya ulih menang ba menua pesisir lalu enda begunaka bantu kami, nya barang ku sida. Kami besedia deka bediri ngatika diri,” ku Sng lebuh nimbal jaku Chong.

SWP ke kala ngumbai diri bekaling enggau BN sebedau nya, begempung enggau penyakal menua nyadi komponen parti PR.

Taja pia, Hari Enam minggu nyin tadi, Sng lebuh bejaku ba aum media madahka parti bukai dalam gempung penyakal udah nguji berapa kali mujuk  kaban kunsil nengeri ari parti nya nyengkaum ngambi kaban tinggi parti nya mega.

Berindik ari tu, SWP mutuska sida iya diau enda lama berundingka pekara tu lebih agi kaul sida iya enggau komponen parti PR.

Taja pan nadai nama tauka nama parti bisi disebut dalam au media nya, Chong maya Hari Satu tu tadi ngenadaika penemu ti deka ngambi pemesai SWP.

Kaban Kunsil Nengeri (ADUN) Kota Sentosa nya madah, ukai sida ke deka ngambi kaban parti nya, tang kaban parti nya ke nanya sida (DAP) dulu.

Iya mega besemaka ulah SWP nya nyerumba pengawa ke digaga deka begempung enggau BN baru, laban nya tuju SWP ngena isu nya nyadi dalih mulaika diri ngagai BN, laban ari perati Sng, komponen parti BN pan bisi charut, nya alai tu peluang ke manah kena mulaika diri ngagai BN, ku Chong.

Naka ke diatu, SWP bisi dua iku wakil rayat (ADUN), iya nya Pelagus, George Lagong enggau Meluan, Wong Judat. Ti didinga berita angin, iya nya George Lagong ke ditagit DAP.

Taja pia, lebuh George ditelefon, iya enggai meri sebarang timbal ba berita nya.

Advertisement