KUCHING: Palan Pengerai Dalam Komuniti (PDK) deka mayuh agi ditumbuh lebih agi di menua pesisir sereta ulu entigis.
Chairperson Sarawak Badan Amal Tenaga Ister-isteri (Sabati) Datuk Sri Jamilah Anu madah, naka ke diatu bisi 38 PDK udah ditumbuh tang mimit aja di menua pesisir lebih agi nadai di ulu entigis.
“Nitih penerang ke bisi diatu, bisi 38 PDK udah ditumbuh di serata nengeri tu tang agi balat kurang di menua pesisir lebih agi nadai di ulu entigis, nya ti balat dikemeratka kitai dudi tu ila.
“Sitak ke udah bisi ditumbuh 3 tauka 4 PDK, nya tau dikenudika dulu tang nya mega bepanggai ba pemayuh OKU ba sitak nya. Kitai ngemeratka tempat bukai ti nadai penyikap nya, ku Jamilah.
Iya madah munyi nya lebuh dikerandau pengudah mendingka licha ti dibantaika ulih Opis Pengintu Pengelantang Mensia Mayuh pampang Sarawak (JKMS) begulai enggau kaban Sabati di Opis Wisma Sumber Alam ditu, kilah ensanus.
Iya madah, belanja dikena ngaga projek PDK tu datai ari Perintah Besai lalu disukung Opis Menteri Indu, Pengelantang Pendiau enggau Pemansang Ruang bilik (KWKPK) nengah menteri nya empu, Datuk Rohani Abdul Karim.
Iya nandu, baka di semenanjung, bisi gerempung bini menteri perintah besai ke dikumbai BAKTI, alai gerempung tu udah mayuh muka PDK di serata menua di semenanjung lalu bechuntoka Johor aja ku Jamilah, bisi 40 lebih PDK udah ditumbuh.
Nya alai ku iya, di Sarawak patut bisi mayuh agi ari nya, lalu ukai semina di pelilih Kuching tauka di Sri Aman aja.
“Nya alai, sehari tu kami mendingka lich ari JKMS, ngambika kaban Sabati nemu agi pasal pekara tu enggau silik agi ke deka meri penguntung ngagai mensia mayuh ke diau di sitak nya lebih agi ba apai indai ke diau di sitak nya ke bisi anak nyelai pendiau (OKU),” ku iya.
Penumbuh PDK dalam genturung pendiau ke bisi nembiak OKU tauka apai indai tau belajar ba palan PDK, ngambika ulih nyapai tuju, OKU enda kena tinggal ari arus pemansang.
“Ba PDK, sida ulih belajar, lalu ngulihka penemu pengabis kurang pan diajar nyaga diri lalu baka apai indai ke bisi anak OKU, tau belajar chara nyaga anak diri ke timpang pendiau.
“Ba aku, OKU tu nasit seiku-seiku, sida iya pan enggai ada baka nya, tang enti sida iya diteju diau di rumah aja, enda ngulihka penemu, pagila lusa lebuh sida iya tuai, sapa ke deka nyaga sida iya.
“Nya alai di PDK, sida iya diajar ngatika diri empu lalu diajar ngidupka diri, pengabis kurang pan, apai indai enda irauka anak sida. Enti enda ulih belajar 100 peratus, 50 peratus pan udah pama,” ku iya.
Iya ngelalau apai indai, enti bisi anak sida iya OKU, anjung ngagai PDK ke semak enggau sida iya tauka padah ngagai kaban Sabati muka PDK ba sitak nya bekerejasama enggau JKMS.
Jamilah ke bisi penelaba 15 taun muka PDK ba sitak Muara Tuang enggau Lundu madah Sabati ulih mantu meri sukung moral ngagai program tu, lalu ngiga belanja kena ngaga aktiviti ke PDK ba sitak iya empu.
“Tu entara aktiviti Sabati mantu sida ke enda benasit,” ku iya.
Sama bisi ngulu atur pengawa nya, Sapit chairperson Sabati, Dato Sri Empiang Jabu enggau Direktor JKMS Abang Shamsuddin Abang Saruji.