Dikarang Chris Bishop, Jacqueline R. David //
KUCHING: Kimpin ngulihka 100,000 sain jari DAP ti dipejalai enggau tuju ngansak perintah ngurangka tarif lekterik ngagai 30 peratus tau ngeruga pemanah pejalai pemansang ekonomi nengeri diatu.
Menteri Perengka Guna Mensia Mayuh Datuk Amar Awang Tengah Ali Hassan madah DAP seruran deka ngerachun runding rayat taja pan sida nemu tarif lekterik ke ditetap di nengeri tu entara ke pemadu baruh enti dibandingka enggau nengeri bukai.
“Taja pan suah dipejurai di dewan berapa taun ke udah, DAP tetap mantah tauka ngaga diri enda nemu tarif lekterik kitai nyadi tarif ke pemadu baruh ba menua tu kenyau ari taun 2009.
“Pukul rata tarif lekterik kitai di Sarawak iya nya 29.8 sen/kWh. Tarif tu 30 peratus kurang ari tarif TNB 38.5 sen/kWh. Strategi perintah nengeri ti bekenaka bekal lekterik ari palan hidro mujur nentuka tarif kitai mengkang ba tikas ke sama,’ ku iya.
Awang Tengah mansutka jaku tu rambau nyimpul jurai Aum Dewan Undangan Nengeri (DUN) ke 17 ditu, kemari.
Iya nambah, DAP majak mantah dia Sarawak udah ngena lalu deka seruran ngena tarif lekterik ke pemadu baruh di Malaysia.
“DAP mantah tiap kompeni ti beranakka puku di kandang Score, deka meli bekal lekterik ari kitai lalu nyendiakka awak gawa ngagai peranak nengeri tu.
“Sida mega ngaga diri enda nemu semua bekal lekterik ari palan hidro Bakun enggau Murum udah dibeli kompeni ke diduduk di Score,’ ku Awang Tengah.
Dewan udah nya chapuh pengudah ADUN Kota Sentosa ke mega Chairman DAP Nengeri Chong Chien Jen angkat sereta nimbal jaku Awang Tengah.
Enda setuju enggau penerang Awang Tengah, Chong majak mantaika penemu ti ngujungka iya diasuh Speaker DUN Dato Sri Mohd Asfia Awang Nassar duduk jenuh.
Nyambung jaku simpul nya, Awang Tengah madah Sarawak Energy Berhad (SEB) patut ngembuan penegap ba pekara wang ngambika agenda pemansang Score ulih dikemujur.
Ku iya, ngurangka tarif lekterik munyika dipinta DAP tau ngeruga pengerembai ekonomi Sarawak sereta nekul juluk nyapai nengeri mansang manggai ba taun 2020.
“Pinta DAP mega deka nekul atur pemansang ti udah ditusun di menua pesisir sereta nutup awak peranak nengeri ti dekaka gaji ti besai enggau pengidup ti lantang,’ ku iya.