SRI AMAN: Limapuluh satu buah rumah panjai nyengkaum empat buah sekula primari di genturung pendiau Melayu enggau China ulih betengahka jalai alun ke manah agi enti pengawa melakin jalai Lachau, dalam Pelilih Mit Sri Aman dipejalaika enda lama agi.
Menteri Muda Betanam Betupi Moden, Datuk Mong Dagang madah, pengawa melakin jalai pemanjai 5 kilometer ti beungkus RM4 juta nya deka berengkah tengah bulan Mei tu.
Ku Mong, jalai Lachau ke digaga kena pun taun 1960 nya mengkang bebatu. Enti udah dibelakin ila, peranak menua nya ulih nengah jalai ke manah agi.
“Berita tu tentu ngelantangka ati peranak menua dia laban udah lama sida nganti jalai nya dibelakin,” ku iya.
Mong bejaku munyi tu lebuh berandau enggau pemberita beserimbai enggau penemuai iya matau pemansang ba kandang sitak Kunsil Nengeri Bukit Begunan, ditu ensana.
Iya disempulang Injinir Opis Kereja Raya (JKR) Pelilih Sri Aman, Cassidy Morris.
Mong ke mega Kaban Kunsil Nengeri Bukit Begunan madah, enti pengawa melakin jalai Lachau nya tembu ila, reti nya empat batang jalai besai ba sitak nya udah tembu dibelakin.
Empat batang jalai besai ti ku iya, iya nya Jalai Kara, Jalai Sungai Besai Selanjan, Jalai Munggu Beringin enggau Jalai Lachau.
Mong mega madah, jalai ari Lachau nuju ke jalai Selanjan Angkong penyauh 21 km benung dipejalaika diatu.
“Aku meri terima kasih ngagai perintah kelebih agi JKR Sri Aman ti dikearap bejalaika pengawa nya udah bebendar bejalaika pengawa sida ngemansangka DUN Bukit Begunan,” ku iya.
Mong mega ngelalau rayat di Sri Aman terus nyukung perintah Barisan Nasional (BN) ngambika sida majak nerima pemansang.