Ukai semua orang dalam parti bisi kaul enggau kimpin merambu meri undi enda pechaya nya
MIRI: Presiden Parti Demokratik Progresif Sarawak (SPDP) Tan Sri William Mawan Ikom madahka iya enda nundukka sesapa kaban tauka gerup dalam parti nya, ketegal nerima baru gerup G4 ke kala ditingkilka iya sebedau tu.
Mawan madahka iya bisi formula diri kena mutarka penanggul nya laban iya enggai meda penyarut ke nyadi sebedau tu, nyadi baru dalam parti nya.
“Aku nemu ukai semua orang dalam parti bisi kaul enggau kimpin merambu meri undi enda pechaya nya.
“Aku enda nunduk sereta malas pengawa sida.
“Aku bebendar deka ngiarka pekara nya, nya alai ketuka semua (perambu deka ngelaban iya sereta ngatur aum),” ku Mawan lebuh ke ditanya Utusan Borneo ditu sekalika iya deka ngatur sebengkah aum bekaul enggau penyarut ke nyadi ba parti nya diatu.
“Aku enggai meda penanggul ke nyadi dalam parti tu nyadi baka gaya politik di Thailand.
“Enti kita ngereja sesebengkah pengawa (tauka merambu sesebengkah pekara) deka datai sebengkah gerup agi ti ngujungka pekara tu majak besai. Kaban parti tu patut nemu, gaya parti ke enda tegap deka mandangka imej ke enda manah,” pia ku iya.
Ku Mawan, iya deka ngiring parti nya ngambika maju agi sereta mega nimpai jauh ti pulaika pemaik ngagai parti nya jemah ila.
Iya ngelalau kaban parti nya anang mutarka penanggul nitihka pengeringat ati sida, laban ulah ke baka nya ngemarka agi pengawa mutarka penanggul ti nuntung parti nya.
Mawan mega madahka iya diatu benung berunding enggau bala kaban SPDP ba tikas nembiak redak nyauka ninting hari, ngiga chara mutarka penanggul nya sereta mendingka penemu ari sida.
Taja pia, iya nemu bisi sekeda orang ti ngembuan kebuah kediri empu, ukai semina ketegal kuasa politik tang bisi kuasa bukai ti dekaka presiden parti enda dikeibuhka.Mawan sekali agi madahka iya nadai ngasaika pemar nyentuk ke iya nurutka peminta raban nya, seraya madahka SPDP sebuah parti ti talukka BN.
Mawan minta semua kaban ngemeratka parti ari ngemeratka pekara diri empu, sereta mega anang ngembuan ulah ke semampai deka nyadi ‘champian’ dalam semua pekara.
Iya mega minta semua kaban parti terus berakup sereta anang pambar semina ketegal pekara nya, tang iyarka orang ti nguji ngaga penyarut dalam parti nya.
Lebuh ke ditanya, nama ukum ke patut ditinggang ngagai gerup ti merambu deka meri undi enda pechayaka iya, Mawan madahka diri bedau berundingka pekara nya.
Dulu ari nya, Mawan udah nyuaka belanja RM25,000 kena melanja ungkus ngaga Gerija Anglikan Holy Trinity di Lambir, ba bilik VIP, Padang Bilun Miri ditu lemai kemari.
Iya nemuai kitu laban ke ngulu pengerami makai lemai beserimbai enggau Hari Gawai Dayak ke diatur Serakup Indu Dayak Sarawak (SIDS) Pampang Niah di Dewan Mensia Mayuh Batu Niah, malam kemari.