Anda di sini

Pengawa ngemanah jalai batang penyauh 59 Km nuju Ulu Lemanak, Ulu Engkari patut dikelengkas

Advertisement

Dikarang Chris Bishop //

KUCHING: Pengawa ngemanahka jalai batang ngambi ulih ditengah entukar nuju Ulu Lemanak penyauh 25 Km sereta ke Ulu Engkari (34 KM) entara atur ke patut dikemujur perintah enggau lengkas.

Mansutka pinta tu rambau Aum Kunsil Nengeri (DUN) ba Hari Ke-5, Kaban Kunsil Nengeri (ADUN) Batang Ai Malcom Mussen Lamoh madah, pengawa nya udah disemayaka Menteri Besai Datuk Seri Najib Tun Razak maya pengawa bepilih parlimen taun 2013 suba.

Kelimpah ari nya, Mussen mega minta perintah nyendiakka projek rumah kos mit di Lubok Antu ngambika bisi endur sekeda peranak ari skim Palan Pengentap Pendiau diau berindik ari penyampau tubuh dalam ruang bilik ti majak mayuh.

“Pengawa ngeluar lisin OT ungkup kereja batang ba tanah NCR patut diatur nengah randau ke menuku ngambika tau nyeliah penyarut enggau peranak menua dia lebih agi senentang bayar pampas tanah.

“Belanja tambah patut mega disedia pengudah pengawa ngaga loji pemeresi ai di Lubok Antu tembu. Belanja tu dikena nyambung batang paip ai lalu deka nentuka mayuh agi rumah panjai teulihka bekal ai beresi,” ku iya.

Entara ti begunaka bekal ai beresi iya nya rumah panjai ba semanjai Ng Bulo-Engkilili, Rasau, Ng Kumpang, Danau, Kandis, Kumpang Paoh enggau Kumpang Langgir.

Enam buah ngelingi Lubok Subong-Ng Kesit, Rh Dimbab, Rh Saong, Rh Edat, Rh Empaok, Rh Samban, Rh Tindit.

Lapan buah rumah panjai ba sepemanjai jalai Lubok Subong – Gugu mega beguna bekal ai beresi iya nya Rh Tugong, Rh Pagang, Rh Ulin, Rh Unsa, Rh Bugi, Rh Baba, Rh Jemat enggau Rh Nyambong.

Lima ke bukai iya nya Rh Imban, Rh Entunie enggau Rh David ba sepemanjai Jalai Sesco Sebangkai – Nyato.

Dua buah rumah panjai ari Batu Kaya nuju Wong Pandak enggau Wong Panjai bela nagih bekal ai beresi.

“Nuju menteri ke megai kuasa nya, anang ngelak ke aku betempik sepiak tapa, udah kelalu lama,” ku Mussen.

Advertisement