BEBAJIK: Dayung Sangon 2014, Elssey Lessianna
(tengah) diapit Jacqualine Ayong (kanan) enggau Iesha Bezzant.
KUCHING: Elssey Lessianna nyapai gelar Dayung Sangon 2014 ba final pekit pemajik gamal ke diatur Dayak Bidayuh National Association (DBNA) nyerumba pengerami ngintu Gawai 2014.
Elssey ti ngalahka 12 iku penyereta final bukai nerima perais mata duit RM3,000 disempulang trofi.
Pekit diatur di dewan DBNA lalu digulu enda kurang ari 1,000 iku pengabang.
Penuduk lumur dua pulai ngagai Jacqualine Ayong lalu lumur tiga Iesha Bezzant.
Seduai nerima perais mata duit RM2,000 enggau RM1,000 sereta trofi.
Semilan iku indu bukai ke mujur masuk renggat final iya nya Sandy Dominic, Jessemi Lewi, Alvey John, Andrea Natalia Jaed, Dolly Charles Saches, Madelina Lija, Denna Sikanok, Elviana Temit, enggau Bellynie Johnek @ Ayong.
Dulu agi ari nya, presiden DBNA Datu Ik Pahon Joyik ba jaku pengelalu madah, pekit diatur ungkup penyendia program ngagai raban nembiak Bidayuh kelimpah beserumpu ngintu Gawai 2014.
“Pekit diatur enggau tuju nyendiaka platform endur kitai matih orang indu bansa Bidayuh ngambika sida ngembuan runding ti seruran pechayaka diri empu sereta ulih ngarika rayat. Pekit mega mandangka adat, pekayan enggau main asal bansa Bidayuh ke nyadi sebengkah identiti ti chukup unik di nengeri tu,’ ku iya.
Pengerami tauka pekit Dayung Sangon 2014 ngundang temuai dipebasa Menteri Pemansang Perengka Guna enggau Penyambung Dato Sri Michael Manyin Jawong ti udah nguluka semua pengabang ngeradak Ai Pengayu 2014.
Pengabang mega diperindang enggau tanda ‘Sigar Berumuh’ ari Raban Main Asal Bau kelimpah beperindang enggau program bukai ke diatur.
Bela datai Temenggung Datuk James Jimbun Pungga, Temenggung Austin Dimin enggau Temenggung Robert Sulis.