KUCHING: Opis Menteri Pengawa Berumah (MOH) deka bejalaika ‘Skim Pinjaman Rumah Panjang Mesra Rakyat’, konsep baru ti berengkah dipejalaika taun tu.
Menteri Muda Pengawa Berumah Datuk Francis Harden Hollis (gambar) madah, ungkup belanja Skim Pinjaman Rumah Panjang Mesra Rakyat nya diberi perintah besai lalu penyampau rumah panjai ke patut dijali duit nya bepanggai ba pansik opis menteri pengawa berumah.
Tuju skim nya endang dikena mayar ungkus belanja ngaga enggau meli tetiap pintu ba rumah panjai ti minta skim, baka ba dalam pelin rumah ti dikemandarka HDC.
Rumah panjai ti deka minta skim nya patut enda kurang ari 10 pintu sereta tuai rumah ba rumah panjai nya dichiri perintah.
“Atur minta skim tu iya nya ungkus ngaga sepintu enda lebih ari RM75,000. Sabsidi ke dibayar perintah besai, iya nya sebagi ari tiga (1/3) ari ungkus ngaga lalu enda lebih ari RM25,000 sepintu.
“Penyampau ke ulih diinjau sepintu iya nya 2/3 ari ungkus (ngaga) enggau enda lebih ari RM50,000 sereta patut dibayar pulai ngagai perintah dalam timpuh 25 taun nyengkaum bungai 2 peratus.
“Taja pia penyampau rumah panjai ti dikemendar bulih skim tu bepanggai ba ungkup belanja ari perintah besai,” ku iya.
Harden mansutka pekara nya ngagai raban pengarang berita pengudah ngulu Aum Kunsil Nengeri sesi pagi ditu, ensana.
Nitihku iya, ba taun tu sebuah rumah panjai udah dikemendar bulih Skim Rumah Panjang Mesra Rakyat ti deka dipejalaika enda lama agi .
“Rumah panjai ti keterubah bulih skim tu iya nya Rumah Colin di Bakong, Miri ti bisi 23 pintu sereta nerima ungkup belanja ari perintah besai penyampau RM2.25 milliun.
“Tanah udah disukat lalu surat pala tanah lot tetiap pintu udah diberi, lalu projek ti ngena konsep baru deka berengkah enda lama agi,” ku iya.
Kelimpah ari nya Harden madah, penyampau projek nengah Skim Pinjaman Rumah Panjang ti udah digaga sereta dikemanahka ari taun 1976-2013, bisi 567 buah rumah panjai ti mungkur 13,105 ruang bilik sereta nguna ungkus belanja RM87,625,459.94.
Tuju Skim Pinjaman Rumah Panjang dikena mantu peranak rumah panjai ngemanahka agi tauka ngaga rumah baru.
“Ba taun 2014 bisi 22 buah rumah panjai ti mungkur 497 pintu udah dikemendarka bulih Skim Pinjaman Rumah Panjang, enggau ungkus belanja RM4,908,000,” ku iya.