Dikarang Chris Bishop //
KUCHING: Perambu Sarawak Worker Party (SWP) ti deka ngaul diri dalam Pakatan Rakyat (PR) Sarawak dipeda pedis dikemujur pengudah sebengkah parti ari PR nguji matak dua iku kaban kunsil besai SWP nyereta parti sida.
Presiden Larry Sng madah seiku pengari rayat SWP enggau seiku Kaban Kunsil Tinggi parti udah diining pengari ari sebengkah parti dalam PR ke alai seduai dipinta ngalih.
“Dua iku kaban kunsil besai parti udah dipinta ningkilka diri ari SWP, diau jenuh enda lama sebedau diasuh masuk sebengkah parti dalam PR Sarawak.
“Tajapia, seduai enda nerima undang nya lalu mengkang dalam SWP. Kitai ngasai, ulah tu udah ngujungka perambu SWP ti deka begempung enggau PR pedis dikemujur,” ku iya.
Sng mansutka jaku tu ba sebengkah aum pengarang berita ke diatur ba Indu opis SWP ditu, kemari.
Iya enggai mantaika nama enggau bagi parti dalam PR ti udah ngenataika undang nya ti diasai iya udah ngeruga pemaik kerejasama SWP enggau PR dalam timpuh enam bulan ke udah.
Dua iku pengari rayat ari SWP iya nya Wong Judat (Meluan) enggau George Lagong (Pelagus).
“SWP lurus deka ngatur kerejasama enggau parti bukai lalu kitai mega keran deka nyereta PR.
“Tang diatu, pejalai perambu begempung enggau PR enda baka ke diatur, kitai deka beratika pekara tu enggau silik,” ku iya.
Nyaut tanya pemberita, Sng madah ulah nya dikereja dua iku pengari rayat (YB) ari sebengkah parti dalam PR lebih dua bulan ke udah.
Ku iya, seduai ukai diundang raban mit dalam PR tang udah diundang ketuai dalam parti. Pekara tu udah ngemaruh kerejasama ti deka diatur SWP enggau parti dalam PR.
Ba kaul bukai, Sng madah parti deka ngatur Aum Besai Ninting Taun (AGM) kedua ba Kuching kena 19 Julai lalu palan endur ngadu aum deka ditetap ba maya bukai.