Anda di sini

Pemeri ti besai rega, penyayau ari ati kitai ngagai indai

Advertisement

KUCHING: Tiap kali ngintu Hari Indai, tentu mayuh bala anak ngiga pemeri ti deka diberi ngagai indai. Tang ni penyauh, pemesai reti nya ulih meri penyenang ngagai ati indai kitai.

Nancy Sabi, 54, ari Kampung Tungkah Dayak Atas, Sebangan Simunjan bepenemu maya Hari Indai ukai reti semina endur ngayanka pemeri ti berega tang ke bendar penyayau ari asai ati diri empu ke indai ti udah ngada ke kitai.

Iya madahka penyayau nya mega patut ukai semina jaku aja tang ari pengawa kitai ke nyadi anak enggau indai.

Taja pia ku iya ti bisi tiga iku anak, tiap iku orang ngena chara ti bebida lebuh ngintu Hari Indai.

“Ba aku, ngitu Hari Indai tu endur aku ngenang sereta ngingatka pengasih enggau penyayau, pemerinsa enggau pemedis indai ti udah ngada ke aku, ti udah meri pengidup ti meruan.

“Pengawa indai ti ngada ke kitai besai besai amat reti. Ngasaika ba aku empu ti mega udah nyadi indai, ketegal nadai orang ngibun anak maya anak aku agi mit, dia aku sanggup ngetu gawa nyadi pengajar. Diatu semua anak aku udah mujur magang ba Institut Pelajar Tinggi.

“Maya Hari Indai enti kitai enda teberi duit tauka pemeri berega enda ngawa laban nuan ulih madah, terima kasih indai laban nuan udah ngemesaika aku, nya udah manah.

“Ukai indai kitai minta perais ti berega ukai minta duit tang ke bendar indai kitai deka ke kasih sayau ari kitai, lebuh sida iya sakit kitai nyaga enggau ngibun sereta mayuh chara bukai nunjukka penyau enggau pengasih ngagai indai,” ku iya lebuh dikerandau pengarang berita ba sebengkah pengerami kemari.

Hari Indai, dikerami tiap taun di serata dunya. Tang, Haribulan pengerami tu bebida ba tetiap menua.

Di Malaysia taun tu, Hari Indai ditetapka seharitu 11 Mei iya nya Hari Minggu kedua taun 2014.

Nitihku Nancy, maya Hari Indai iya ngirumka pesan pandak (SMS) ngagai indai iya ari pengasai ati iya empu.

Ku iya, chara iya nyambut Hari Indai mega ditunda tauka ditampung anak iya, iya nya bala anak iya selalu ngingat sereta ngenang pengasih enggau penyayau iya.

Lebuh berandau Nancy bekunsi pengaga ati lebuh ti nerima pesan meri Selamat Hari Indai ari anak iya kemari.

Kitai ke udah nyadi indai patut meri chunto manah ke anak, indai patut ngayanka basa tauka ulah ti manah ngambika anak kitai jemah ila ulih nunda lalu bebasa sereta meri penyayau ngagai kitai, ku iya.

“Seharitu aku udah nerima SMS Selamat Hari Indai ari anak aku. Maya Hari Indai aku selalu meri sms ngagai indai aku, lalu nya meh ke ditunda anak aku sehari tu,” ku iya.

Advertisement