Dikarang Rengenyan Labang //
KUCHING: Iban Women Charitable Trust (IWCT) dikearap ulih meri penyedar enggau peransang ngagai indu Iban pasal pekara ekonomi, adat enggau main asal, pelajar, pengerai sereta pekara rama.
Chairperson IWCT, Datuk Sri Empiang Jabu madah, nengah IWCT dikearapka ulih meri penyenang sereta ngelempungka pengawa ti deka dipejalaika raban indu Iban baka SIDS.
“Juluk kitai numbuhka IWCT endang dikena ngelaku, ngemansang, meransang sereta ngenyedarka raban indu Iban dalam pekara ekonomi, adat enggau main asal, pelajar, pengerai sereta pekara rama bukai nitih singkang tauka ubah ke patut baka ti dikemendarka ‘Board of Trustee’.
“Kena ngemujurka juluk nya, IWCTdeka besaup enggau Gerempung Ukai Dikuasa Perintah (NGO) bukai baka SIDS ke ngembuan pengering berindik ari penyampau 12,000 iku kaban.
“Orang ke tau bulih penguntung ari IWCT iya nya indu Iban ti tulin tauka peranak Iban enggau bansa bukai ke udah dikelala bansa sekalika nengah adat ngiru ba Iban tauka nengah Undang-undang,” ku iya.
Empiang ti mega Chairperson Sarakup Indu Dayak Sarawak (SIDS) nya lebuh bejadika licha ‘Understanding Goods and Services Tax (GST) and Its Implication’, ti diatur SIDS pampang Kuching enggau IWCT ba sebengkah hotel ditu kemari.
Bejaku baru iya madahka diri endang chakah deka ngemansangka raban indu nengah IWCT ngambika ulih besemekih enggau bansa bukai dalam ekonomi, pelajar enggau pekara bukai.
Taja pia, kitai indu Iban anang mega semina bepanggai ba IWCT aja laban ke lumur satu, endang nengah pemujur ba pekara pelajar ti ulih ngiring kitai besemekih enggau bansa bukai.
“Aku udah bisi peneleba, ngasaika pemerat ba indu kitai Iban beserunyut nengah pemansang renggat nasional tauka antarabansa. Tu bepun ari pemayuh randau ke udah dipejalai kena ngemansangka raban indu Iban nengah IWCT.
“Nengah pelajar, indu Iban ulih besemekih enggau bansa bukai ngulihka pengeraja ari menua tu empu kelimpah ari bulih penguntung ari IWCT,” ku iya.
Sama bisi ngulu pengerami nya kemari, Trusrtee ti mega Penyanding Penemu SIDS Pampang Kuching Datin Senorita Linang, Sapit Chairperson SIDS Datin Catherine Gramong enggau ke bukai.