KUCHING: Sapit presiden Sarawak Workers Party (SWP) George Lagong nadai penanggul nyerahka sitak Pelagus ngagai presiden parti nya, Larry Sng ba pengawa bepilih nengeri (PRN) ke deka diatur dudi tu ila.
“Naka ke diatu kami nadai berandau pasal nya, tang enti parti ngasaika bisi orang bukai ke ulih gawa manah agi nyilih aku, aku nadai penanggul ningkilka diri,” ku George.
Iya madah ngagai The Borneo Post lebuh ke betemu enggau pemberita ba lobi Kunsil Nengeri (DUN) Hari Lima tu tadi.
Lebuh ke ditanya sekalika iya bisi ati deka bepilih ba sitak Baleh, ke alai sitak nya diatu dipegai Tan Sri Dr James Jemut Masing ngarika Parti Rakyat Sarawak (PRS), engka enda, ku saut George.
“Engka enda, udah dua kali bepilih ba sitak Parlimen Ulu Rajang, lalu aku nemu diri enda teulihka sukung ari rayat dia. Manah agi aku anang masau jam dia agi,” ku iya.
Taja pia ku iya, pejalai politik iya ukai padam semina naka nya aja enti sema SWP mutuska penemu milih Larry nyilih iya bepilih ba sitak Pelagus.
“Aku tetap regas ba politik taja pan aku mengkang saru runding enggau utai ke nyadi ila. Dalam politik, semua nya bepangai ba gaya penyadi lalu semina ditemu enti udah datai ba maya iya,” ku iya.
Ba Pengawa Bepilih Kunsil Nengeri (PRN) ke sebedau tu, George udah bepilih ba sitak Pelagus nyadi chalun ngatika diri pengudah Larry ke mega penyandang sitak nya enda dipilih ngetanka penuduk nya pengudah iya ditingkilka ari PRS.
Maya Pengawa Bepilih nya, Larry enda bediri laban mengkang mangku pengawa nyadi Penyanding Penemu Nembiak, tang nyukung George bediri nyadi chalun ngatika diri betapi enggau chalun BN Stanley Nyitar di Pelagus, ti ngujungka iya lalu menang udah nya.
Pengudah SWP ditumbuhka dalam taun 2012, Larry dipadu nyadi presiden lalu George nyadi sapit iya nyentuk ke diatu.
Ba Pengawa Bepilih Besai nyin tadi, SWP udah nudukka chalun bepilih ba semua enam iti sitak ke diempu PRS baka Sri Aman, Julau, Selangau, Kanowit enggau Ulu Rajang, tang sida alah magang nyengkaum presiden parti nya ke bepilih di Lubok Antu.