SIBU: Tikit mija Pengerami Makai Lemai Gawai Dayak Tikas Sibu 2014 ke deka diatur ba Hotel Kingwood ditu kena 17 Mei tu mengkang dijual ngagai mensia mayuh.
Chairman komiti pengatur pengerami Ir Alice Jawan madah, taja pan baka nya tikit rega RM1,000 udah mujur abis dijual.
“Diatu semina tikit ke berega RM700 enggau RM500 aja agi bisi dijual,” pia ku iya madah.
Aum ke penudi endar komiti pengerami nya udah diatur lemai ensana, bechairmanka Alice.
Aum nya bela digulu dua iku penyanding penemu komiti pengatur, Temenggung Sir Adrian Ringgau enggau Chambai Lindong.
Nampung jaku iya baru, ku Alice, mensia mayuh ke bisi datai lemai nya mega deka beperindang enggau artis Iban ke benung tebilang diatu iya nya Gabriel Fairuz Louis enggau Raban The Pyred ari Kanowit.
“Berindik ari nya, komiti bela besetuju ngelanjarka timpuh nyual tikit mija nyentuk ke 15 Mei tu,” pia ku iya.
Tuai Pengabang pengerami tu iya nya Menteri Pemansang Rama ti mega Presiden Gerempung Dayak Sarawak (SDNU) Tan Sri William Mawan Ikom.
Lemai nya mega mensia mayuh deka dipandang enggau main asal kelimpah ari pekit Kumang enggau Keling Gawai Sibu 2014.
Kelimpah ari nya, bisi 168 iku nembiak Dayak ti nyulut ba peresa taun seiti suba deka nerima insentif peransang pelajar.
Pengerami sekali tu diatur Serakup Indu Dayak Sarawak (SIDS) Pampang Sibu lalu disaup SDNU Pampang Sibu, SDNU Pampang Rajang, SDNU Pampang Sibu Jaya enggau Gerempung Orang Ulu (OUNA) Pampang Sibu.
Ngagai sesapa ke deka meli tikit mija pengerami tu tau betanya ngagai Angelyn Uchi Maseng nengah lumur 016-8825861 tauka Timah Unggit (019-8947029).