Dikarang Rengenyan Labang, Jacqueline R. David //
Enda milih bansa tauka jalai pengarap duit tu dijali kena ngemuntang nembiak belajar
KUCHING: Bantu skolarship enggau injau belanja ari Yayasan Sarawak (SF) tebuka ngagai semua peranak Sarawak, enda ngira bansa, jalai pengarap tauka asal dikena ngenukuka nembiak ulih nampung pelajar sereta enda irauka belanja.
Menteri Muda ba Opis Kepala Menteri Datuk Len Talif Salleh madah, dalam timpuh lima taun ke udah Yasayan Sarawak mayuh udah mantu peranak nengeri ngena ungkup belanja ti udah diagihka tiap taun
“Pasal bantu pelajar, Yayasan Sarawak enda ngira dini endur pendiau peminta. Tu tebuka ngagai semua peranak Sarawak, enda ngira bansa, jalai pengarap enggau asal penatai. Ti pemadu beguna sida ke patut nya ulih nyambung pelajar lalu nadai pengirau ba belanja.
“Dalam timpuh lima taun (2009-2013), Yayasan Sarawak udah meri bantu nengah jali skolarship ngagai 16,550 iku peranak Sarawak ti nampung pelajar ngagai renggat Institut Pelajar Tinggi di dalam tauka luar menua.
“Yayasan Sarawak nengah mayuh macham program enggau Skim Bantuan Pendidikan udah ngungkupka belanja penyampau RM35 juta setaun dikena mantu peranak Sarawak ti nyulut ba pelajar,” ku iya.
Len ti mega Menteri Muda Rampa Menua mansutka pekara nya lebuh nyaut tanya ari George Lagong (Bebas – Pelagus) ba sesi tanya saut maya Aum Kunsil Nengeri kemari.
Berebak enggau nya Len mega madahka penyampau penerima bantu skolarship enggau injau mega nyengkaum nembiak di bagi menua Kapit.
“Ba timpuh 2009-2013, penyampau penerima mayuh macham Skim Bantuan Pendidikan di Institut Pelajar Tinggi ti udah dipejalaika Yayasan Sarawak ba bagi menua Kapit iya nya 695 iku nembiak, tu enda nyengkaum sida ke asal ari Kapit tang nyengkaum ke diau mendam ba bagi menua bukai di serata nengeri.