Dikarang Rengenyan Labang, Jacqueline R. David //
PERINTAH BISI CHARA NGENUKU: Malcolm (kiba) enggau Abdullah lebuh nyaut tanya ari pemberita pasal ‘Private Member’s Bill’.
Taja ‘Private Member’s Bill’ kena ngubah ‘Kanun Tanah Sarawak’ ditulak, ukai reti ADUN Dayak enda nyukung
KUCHING: Taja pan mosyen ‘Private Member’s Bill’ dikena ngubah ‘Kanun Tanah Sarawak’ ditulak Kunsil Nengeri ensanus tang nya ukai reti Kaban Kunsil Nengeri (ADUN) Barisan Nasional ti bebansa Dayak enda nyukung penemu meri gelar ngagai tanah Adat Bansa Asal (NCR).
Pekara nya dipadahka Malcolm Mussen Lamoh (BN-Batang Ai) dikena nimbal penemu sekeda orang ti madahka ADUN bansa Dayak enda beratka pekara nya.
Mosyen ‘Private Member’s Bill’ nya dibantaika Baru Bian (PKR-Ba’Kelalan).
Tang, ku iya nandu, perintah bisi chara bukai dikena meri gelar sereta ngenuku pekara nya, ukai baka ti deka diubah dalam mosyen ke diperambuka Baru nya.
“Kami ukai enda ngemeratka isu nya, tang perintah menua amat komited deka mantaika undang-undang dikena nentuka Pulau Galau enggau Pemakai Menua.
“Aku enda ulih nyebut sekalika undang-undang nya ulih dikena tauka enda. Nya bepanggai ba sida ti bekaul enggau pengawa ngaga undang-undang tu.
“Aku arapka lebuh undang-undang tu digaga ila, sida ari kededua penemu politik sereta Gerempung Ukai Dikuasa Perintah (NGO) sama bela dibai ngaga undang-undang tanah NCR,” ku iya.
Malcolm mansutka pekara nya ngagai raban pengarang berita di Bilik Media ba Kunsil Nengeri (DUN) ditu kemari, seraya disempulang Abdullah Saidol (BN-Semop) ti mega chairman Kelab Penyukung Barisan Nasional.
Dalam aum pengarang berita lebuh ditanya sekalika Baru tau dipilih nyadi seiku pakar ti tau dibai ngaga undang-undang, Malcolm madah;
“Au pelaba aku, kitai tebuka lalu enda ngira sekalika pakar tauka orang nya ari sepiak penyakal tauka BN. Sida gerempung NGO baka Majlis Adat Istiadat, Sarawak Dayak National Union (SDNU) enggau ke bukai mega tau sama dibai.
Kelimpah ari nya ngenang pekara ti sama Abdullah madah, perintah deka ngaga undang-undang ti lebih silik dibandingka enggau rang undang-undang ti dibantaika ensanus.
“Pasal undang-undang peranak menua, kitai begunaka orang ti amat bepenemu pasal adat peranak menua laban semua orang madahka diri landik pasal nya.
“Nya alai kami ngarapka orang ti ngulu pasal undang-undang peranak menua tu patut bisi penemu ti senipak enggau pengawa tauka undang-undang NCR,” ku iya.
Berebak enggau tu Abdullah lebuh ditanya sekalika langur deka ngubah Kanun Tanah Sarawak nya patut nyengkaum tanah NCR bansa bukai baka Melayu enggau Melanau, iya ngarapka disengkaum.
“Aku ngarapka baka nya. Taja pia, ari peneleba aku di menua aku empu, kitai enda tau enda nyerahka sekeda tanah kitai ngambika ulih dikemansang,” ku iya seraya ngarapka perintah meretika sekeda sensitiviti baka adat bansa.