KUCHING: Nembiak nengeri tu ti nadai pelajar renggat Penilaian Menengah Rendah (PMR) enggau Sijil Pelajaran Malaysia (SPM) ulih belatih ngulihka pengelandik ba palan latih Mara.
Kebuah pia ku Menteri Muda ba Opis Kepala Menteri (Pengatur Pemansang Teknikal Pelajar) Datuk Len Talif Salleh madah, laban juluk numbuhka Palan Giat Mara nya endang dikena meri peluang ngagai nembiak ngulihka pengelandik sebedau gawa.
“Nembiak ti nadai pelajar renggat PMR tauka SPM ulih nerima latih ba palan Giat Mara enggau syarat nembiak nya peranak Malaysia, bumiputera, umur 15 taun ke atas, nemu macha enggau nulis lalu ke pemadu beguna bisi pengerindu (dalam pengelandik),” ku iya lebuh ti nyaut tanya tambah ari Annuar Rapa’ee (BN-Nangka) maya Aum Kunsil Nengeri kemari.
Nitihku Len penyampau palan Giat Mara di serata Sarawak bisi 31 buah nyengkaum di Kuching bisi enam (6) buah, Sibu (4), Sri Aman (3),Miri (3), Mukah (3), Kota Samarahan (3), Sarikei (2), Limbang (2), Kapit (2), Betong (2) enggau sebuah di Bintulu.
Lebuh nanya saut ari Annuar bekaul enggau kos ti disediaka ba Giat Mara Sibu, Len madah, kediatu Giat Mara Sibu nyendiaka kos Pendawaian Elektrik enggau Kursus Fesyen dan Pembuatan Pakaian.
“Gita Mara Sibu benung dalam proses nambahka kos baru iya nya Kursus Teknologi Penyejukbekuan dan Penyaman Udara tauka lebih dikelala agi enggau nama kursus aircond.
“Penambah kos nya dikena napi peminta guna industri dalam bidang nya enggau makit ti majak ngerembai lebih agi di menua pesisir,”ku iya.
Len berebak enggau nya madah, Giat Mara ke bukai ti semak enggau Sibu iya nya Giat Mara Lanang bisi nyendiaka Kursus Automotif lalu Giat Mara Selangau nyendiaka Kursus Kimpalan enggau Fabrikasi Logam.
Giat Mara Sibu diatu agi bejalaika latih ba premis ti dibeli MARAti berengkah ngelatih 1 Mac 2000, lalu palan nya dipelabaka agi tetangkupka pemayuh guna nembiak ti belatih ba endur nya.
“Naka ke diatu palan Giat Mara Sibu ulih ngambi urung 60 pelatih ba sebengkah timpuh nyengkaum ulih tetangkupka kos baru iya nya kursus aircond enggau penyampau 20 pelatih baru ba siti sesi ngambi pelatih.
“Tang nyema peminta nya tinggi ila, perambu ngemesaika Giat Mara Sibu deka digaga dalam RMKe-11 tauka nyema bisi ungkup belanja ari perintah dikena ngemesaika infrstruktur (deka dipejalaika),”ku iya.