KUCHING: Program pemansang estet mini ti dipejalaika Opis Betanam Betupi (JPS) Sarawak semina mekuh pengawa nanam getah aja lalu nadai kaul enggau kelapa sawit.
Menteri Betanam Betupi Moden, Tan Sri Datuk Patinggi Alfred Jabu Numpang madah, konsep bejalaika program estet mini getah iya nya ditanam bekelompok enggau pemesai minima 20 hektar tiap estet mini.
Jabu ti mega Sapit Kepala Menteri mansutka pekaranya lebuh nyaut tanya ari Datuk Joseph Mauh (BN-Tamin) dalam Aum Kunsil Nengeri kemari.
Iya madahka tiap penyereta semina ulih nerima bantu nyentuk ngagai 4 empat hektar aja.
“Program estet mini tu semina ulih dipinta Ketuai Ruang Bilik (KIR) lalu tiap penyereta semina ulih nerima bantu nyentuk ngagai empat hektar aja.
“Timpuh projek tu dipejalaika Opis Betanam Betupi Sarawak iya pengelama lima taun setengah lalu enti pun getah nya udah matang kandang projek nya deka diberi ngagai peserta.
“Pengawa ngemansang enggau nyaga projek nya dipejalaika piak kunteriktor ke dipilih nengah proses tinda. Lalu semua ungkus belanja nya (ngemansang enggau nyaga) dipelanja perintah,” ku iya.
Iya ti mega Menteri Pemansang Menua Pesisir arap bendar projek estet mini nya ulih nyungkak penatai pemisi penyereta ti masuk projek nya.