CHAMPIAN: Zines John nengah lagu `Udah Laun’ champian Pekit Karaoke Lagu Dayak 2014.
MIRI: Dalam semua pekit menang tauka alah endang udah nyadi adat, nya alai nadai kebuah sesiku nya tau berasai ringat tauka sinu.
Taja pia, pekara ke pemadu besai reti iya nya bisi peluang mantaika pengelandik diri ba mua mensia mayuh sereta bulih peneleba ari nya.
“Sekalika kitai mujur tauka enda dalam sesebengkah pekit, nya ukai pekara ke besai.
“Tentu enti kitai menang kitai bulih perais, pia ku Chairman pengatur Pekit Karaoke Lagu Dayak 2014, Ngadan Melintang lebuh ke bejadi pekit nya ke diatur ba Bintang Megamall ditu, apin lama ke udah.
Zines John ari Lambir udah ngait ati bala akim nengah lagu `Udah Laun’ ngalahka 12 iku pemekit bukai. Iya nerima perais mata duit RM500, tropi, hamper enggau setipikit.
Julia Michael bulih lumur dua ditangkanka Griffin Lias ba lumur tiga. Julia ari Bandar Baru Permyjaya nerima perais mata duit RM300 lalu Griffin nerima perais RM200 disempulang enggau tropi, hamper sereta setipikit.
Penyereta ke bulih lumur empat nyentuk ke lumur sepuluh mega bisi nerima perais sagu ati RM50 enggau hamper.
Pekit belagu nya mega sebengkah ari atur pengawa Mantar Gawai Bagi Menua Miri ungkup taun 2014 ke deka diatur kena 24 Mei tu ila.
Chairman pengatur Pengerami Gawai, Wilfred Mac sama bisi ngulu pengerami nya sereta bisi diberi basa nyuaka perais.
Lebuh ke bejakuI, Mac ngenataika pengaga ati iya ngagai bala penyereta pekit nya seraya meransang sida majakka pengerindu ba pengawa belagu seraya ngerembaika pengelandik sida nya.
“Iya mega meri terima kasih ngagai Nestle Sdn Bhd laban ti udah melanja hamper enggau raban ari opis Bintang Megamall ketegal udah nyendiaka palan endur ngatur pekit nya,” pia ku iya.