KUCHING: Ngubah atur undang-undang bekaul enggau Palan Biodiversiti Sarawak (Amendment) Bill, 2014, pekara ke manah lalu patut dikemerat tang iya mega dikearap mungkur lisin batang, ‘provisional leases’ enggau sekeda lisin bukai dalam ordinan tu, ku Kaban Kunsil Nengeri (ADUN) Ba’kelalan Baru Bian.
Baru madah Malaysia nembuan pengabis kurang 15,000 bansa bungai, lalu nitih ripot ari Buletin Kew Vol.65 (2010) madahka Sarawak bisi 12,000 spesis utai tumbuh, tang taja pia, flora enggau fauna menua tu, enti enda dijaga enggau manah, iya deka punas, baka diatu pan udah urung 70 peratus jarang tumbuh baru, ku Baru.
Ko-ordinator Rimba Ilmu Universiti Malaya, Dr Wong Khoon Meng madah sistem kampung ke seruran kena kachau baka kayu kena tebang,angus, ke digaga ulih mensia tau ngerusak sistem biodiversiti kampung menua tu.
“Tang pengelenyau habitat ke nyadi lebuh sitak kampung nya digaga nyadi kebun umai, kebuah spesis ke idup dalam kampung nya punas laban sekali habitat asal nya dikachau, spesis ke jarang dipeda kitai sereta enda mayuh idup agi, deka punas.
gNya alai bepalan ke tu, bakani ku gaya kompeni kayu ke nebang kayu dalam kampung, enti sida iya betanggungjawab nyaga utai tumbuh dalam kampung nya lebuh sida iya nebang pun kayu? Patut ke enda sida iya nitih atur terit nya nyengkaum kompeni kebun bedandang besai nitihka atur nyaga rampa menua?
“Enti semina deka ngubah atur undang-undang biodiversiti aja tang enda mungkur pekara tu, pelaba aku ngubah undang-undang sereta ngaga ‘Principle Ordinance’ nyangka nadai reti,” ku iya lalu nambah, baka nya mega enggau tekad ai laban maya tekad ai nya dibuka, iya deka ngerusakka sistem-eko enggau pengeraja biodiversiti menua tu.
Iya madah bansa nya lebuh mantaika debat iya bekait enggau bacha Rang Undang-undang ‘Sarawak Biodiversiti (Amendment) Bill 2014 di Aum Keterubah ke Penggal Keempat, Aum Kunsil Nengeri ke-17 di Komplek Kunsil Nengeri (DUN) ditu, kemari.
Ba debat nya mega, ADUN Jemoreng Abu Seman Jahwie madahka ubah nya deka negutka undang-undang bekait enggau pemisi biological di Sarawak, baik nya ari reti jaku nya, atur, ukum ke dititih.
“Ubah ba ordinan nya nitihka tuju Ordinan Principal nyaga pemisi biological di menua tu. Kitai ngembuan reta biodiversity ke besai di Sarawak.
“Dalam kandang berapa taun tu ke udah, tukang pansik mayuh udah tetemuka mayuh macham bansa utai tumbuh dalam biodiversiti menua tu. Enggau pemansang tu, sigi bisi reti kitai ngerembaika pemisi biological,” ku iya.
Iya nandu baru, kemaya hari tu, sistem immune kitai makin hari makin lemi lalu kitai pan muntang kena penyakit enggau pengemar ubat kemaya hari tu.
“Nyangka siti ari bengkah ke patut dipansik iya nya ubat ke ditemu ari utai tumbuh di kampung. Kampung Tropikal kita di Sarawak, ngembuan 25 peratus utai tumbuh ke ulih digaga nyadi ubat,” ku iya.
Abu Seman besemaka sebengkah ari produk kampung ke muntang ditemu di Jemoreng, iya nya bansa spesis ke dikumbai ‘Buah Sekiu’ ke ngeluar minyak kena ngasuh asi bau rengut.
“Minyak ari buah nya tau dikena nyadi ubat lalu manah kena tungkul ati. Minyak ari buah tu dijual dalam RM70 ke 500ml, lalu iya mega tau nambahka pemisi komuniti ba sitak menua nya. Enti pansik pasal buah tu digaga, nyangka jemah ila iya tau mai penguntung bejuta ngagai menua tu,” ku iya.
Kelimpah ari nya, iya madah pemanah ubah ba undang-undang tu ila ukai semina meri penguntung ngagai menua tu tang mega tau nyadi penguntung ngagai orang asal ke diau ba siti-siti sitak ke bisi ngembuan bansa spesis ke tau digaga nyadi ubat.
“Iya digaga enggau chara nambah sebengkah chara baru dalam ubah nya (b): ‘(bb) beratika pemendar deka dipinta dulu ari orang asal, alai penemu tradisional nya bisi bekait enggau pemisi biological, sereta sempekat nyengkaum penguntung bekunsi nitihka atur ti disetuju kededua piak”.
ADUN Telang Usan Dennis Ngau madah ari kelia, sida ke diau di menua ulu tauka menua pesisir sigi bepanggai ba penemu ngena ubat ke di ulih sida iya ari kampung, kena ngubat enti tabin, telih tauka abi.
“Enti nitih, datai ke seharitu pan, orang agi ngena penemu ubat kampung. Aku entara orang ke endang ada sereta besai di genturung pendiau jauh dalam kampung Borneo tu.
“Aku agi ngembuan penemu, iya nya sekeda utai tumbuh tauka kayu tau nyadi ubat baka kena ngubat pedis perut, tauka getah ari kayu tau dikena nyadi senjata kena ngasu, kulit kayu tau dikena nyadi ubat nyamuk,” ku iya.
Nya alai, ku Dennis, sigi patut undang-undang nyaga pemisi biological di menua tu digaga, nyaga penemu kitai arid iambi ulih kompeni baka kompeni farmaceutikal ke datai ngagai kitai, lalu ngaga diri manah enggau komuniti kitai ke diau di menua ulu, lalu udah nya sida iya meri penemu nya ngagai kompeni tu, ti nyangka tau nyadi ubat sakit riman (chunto aja), ku iya.