Anda di sini

TKPM udah mujur ditumbuh di Kabuloh, ku Jabu

Advertisement

Dikarang Jacqueline David, Rengenyan Labang

 

 

KUCHING: Di Sarawak, Program ‘Taman Kekal Pengeluaran Makanan’ (TKPM) udah dipenyadi di Kabuloh, Miri enggau pemesai endur nya, 217 hektar dalam taun 2009.

Sapit Kepala Menteri ti mega nyadi Menteri Betanam Betupi Moden enggau Pemansang Menua Pesisir, Datuk Patinggi Tan Sri Alfred Jabu madah, kelimpah ari nya, Opis Betanam Betupi (JPS) udah ngaga dua iti agi projek TKPM di Kuching (Rampangi) enggau di Semenggok. Kededua projek nya agi ba renggat ngaga infrastruktur.

“Diatu JPS benung nyendiaka pelin besai ngaga sebuah TKPM di Stesen Pemansik Opis Betanam Betupi Sesang, Roban ke pemesai 60 hektar.

“Utai ke ditanam ba endur nya ila, iya nya nanas,” ku Jabu madah maya nyaut tanya ari Kaban Kunsil Nengeri (ADUN) Saribas, Mohammad Razi Sitam dalam sesi Tanya enggau Saut di Aum Kunsil Nengeri ke-17 ditu, kemari.

Jabu ti mega ADUN Layar madah, berindik ari nya, JPS deka minta ungkup ari Perintah Besai ngambika projek nya digaga taun baru tu ila. Kelimpah ari nya mega, iya madah JPS deka terus ngemansangka sitak bukai ke manah kena program tu.

Ba aum nya mega, ADUN Ngemah Alexader anak Vincent nanya ngagai Menteri Pemansang Infrastruktur enggau Penyambung, Dato Sri Manyin anak Jawong, enti Perintah bisi perambu deka ngaga sebuah jeti di Ng Semaram alai perau enggau sepris ngetu, laban ke diatu, sida ke ngena perau enggau sepris semina ngarapka tebing sungai.

Ku Manyin: “Perintah udah ngemendarka projek ngaga jeti konkrit nyadi terminal ke pengguna perau panjai enggau sepris di Ng Semaram, Kanowit Sibu baruh Langgur Malaysia ke-10 (RMK ke-10).

Tanya ari ADUN Razali Gapor (BN-Beting Maro) bekaul enggau perambu sereta atur Perintah deka ngemansangka orang dagang gula apong ba sitak nya, sereta beratika industri gula apong nya berega, Menteri Muda di Opis Kepala Menteri (Pengawa Pemansang Orang Dagang Bumiputera) Datuk Mohd Naroden Majais madah, naka kediatu, perambu ngemansangka industri nya nbenung digaga.

Iya madah, Perintah ngaku industri gula apong (nama saintifik: Nypa Fruiticians) bisi peluang besai dikemansang sereta dijual.

“Nya alai, Perintah beratika industri tu laban iya berega sereta peminta iya pan besai ari menua tu empu enggau menua luar,” ku iya.

Naka 2012, urung 17 orang dagang baruh Opis Betanam Betupi (JPS) ngaga gula apong tu nyadi industri ke diangkatka sida iya, lalu penguntung ke diulih naka ke diatu bisi RM1.2 juta.

Entara palan ke dijangka deka dikemansangka ngaga gula apong tu, iya nya di Tambak enggau Tambirat (tunga Asajaya), lalu Opis FAMA enggau JPS benung merambu muka sebuah palan alai ngaga gula apong enggau chara moden.

Advertisement