KUCHING: Sarawak udah nganjung peminta ngulihka kuota ‘khas’ minyak enggau gis ke ditemu Petronas di menua tu ngagai Perintah Besai.
Menteri Muda Pengawa Beranakka Puku enggau Industri Datuk Julaihi Nahrawi madah, ungkup ‘khas’ nya berat kena ngem,ansangka stesen kuasa enggau pengawa industri bukai di menua tu.
Ku iya, iya ngarap Perintah Menua ulih beratika pekara nya sereta nimbal peminta Sarawak.
“Perintah Menua udah nganjung peminta bekaul enggau ungkup nya, lalu kami ngarapka Perintah Besai deka nimbal enggau timbal ke positif.
“Tu laban ungkup nya berat kena kitai bejalaika stesen kuasa sereta ngatur industri bukai,” ku iya madah lebuh nyaut tanya ari Kaban Kunsil Nengeri (ADUN) Sadong Jaya, Aidel Lariwoo enggau ADUN Bukit Raja Dr Abdul Rahman Ismail ba Aum Kunsil Nengeri (DUN) ke-17 ditu, kemari.
Nyadi sebuah kompeni petroleum nasional, Julaihi madah Petronas patut beratika perambu Sarawak nya, nambahka ekuiti menua tu dalam projek baru sida di menua tu.
Julaihi ti mega ADUN Sebuyau madah, pengawa nambah peratus royalti petroleum ti diterima Sarawak, Perintah Menua enggau Besai sigi besedia deka bejuraika pekara lebih agi bekaul enggau ngubah ‘Akta Pembangunan 1974’.
“Perintah Menua udah minta ngagai Petronas nyendiaka geran pemansang ke tau dikena dalam pemansang infrastruktur di Sarawak,” ku iya.
Naka ke diatu, Petronas udah bejalaika pengawa sida nyadi penyungkak ekonomi menua enggau pemisi hidrokarbon ti ditemu di tasik di Sarawak.
Berindik ari minyak enggau gis ke bisi ditemu, lebih agi di sitak Central Luconia, Petronas udah nanam puku bebillion ringgit ngaga sereta ngemansangka perengka guna bekaul enggau minyak enggau gis di Sarawak baka Kompleks LNG, Petronas ke udah nyungkak pemesai ekonomi ngagai menua enggau Sarawak sereta rayat menua tu, nyengkaum peluang pengawa ngagai rayat menua tu, enggau pemansang orang ke bepengelandik gawa dalam sektor minyak enggau gis.
Lalu pia mega, Petronas udah bejalaika pengawa sida iya enggau aktif dalam nyaga biodiversiti menua sereta rampa menua baka ke di Kem Piasau Miri, ke udah dikelai Perintah nyadi rampa menua galau sereta pemansang bukai.
“Ba bagi pelajar, Petronas udah ngaga sekeda inisiatif mantu nembiak Sarawak ngulihka pelajar ke manah agi.
“Nengah Program Sentuhan Ilmu Petronas, mayuh rayat Sarawak dipelanja ngambi kos ijazah dalam enggau luar nengeri sebedau sida gawa enggau Petronas, nembiak sekula pan diberi bantu wang kena sida iya belajar nyengkaum kerejasama enggau palan pelajar teknikal ngelatih rayat Sarawak nyadi orang ke bepengelandik,” ku Julaihi.