Dikarang Judan Bungap
PEMENDAR PERINTAH: Gramong (tengah) disempulang bala menua nya maya datai meda projek Jalai Ulu Machan-Nanga Sepitok di Machan, Kanowit.
Penembu projek Jalai Ulu Machan nya deka nguntungka 1,000 iku peranak menua ari 12 rumah panjai: Gramong
KANOWIT: Penembu projek Jalai Ulu Machan ngagai Pasar Machan deka mai penguntung ngagai 1,000 iku peranak menua ari 12 buah rumah panjai dia.
Kaban Kunsil Nengeri (ADUN) Machan Datuk Gramong Juna mantaika jaku tu maya bejadika projek jalai ngelawa Rumah Petay Sibok, 16 pintu ba Nanga Sepitok, Ulu Machan kena 1 Mei tu tadi.
Ba jaku iya, penembu jalai tu ila deka ngemuntangka pejalai rayat dia ngalu ngagai Pasar Machan.
“Perintah naka ulih nyaup ngelempung sereta ngangkatka pengidup rayat.
“Tang rayat patut ngubah runding sida dikena ngulihka pengidup ti lebih agi menyana dudi hari ila,” pia ku iya ti mega Menteri Muda Pemansang Tanah enggau Dagang Temuai.
Pengerami sehari nya bela digulu Kaban Parlimen Kanowit Datuk Aaron Ago Dagang, Pemancha Spencer Kudang, Penghulu Lawrence Melaka enggau Pemesai Opis Pemadah Kanowit Wan Mohd Zuki Wan Ismail.