MUKAH: Serakup Apai Indai enggau Pengajar (PIBG) Sekula Primari (SK) Baoh Ulu, Dalat udah ngatur program ke dikumbai ‘Menyelusuri Jejak Wira Yang Tidak Didendang’ sebengkah chara dikena ngingatka penyiru niang Kaunsilor Lambong Jalang.
Lebuh ke agi idup, niang enggau ati ke lurus udah meri sebidang tanah iya, ngambika bisi endur nirika sekula SK Baoh Ulu ke diatu, kena pun taun 1960 suba.
Berebak enggau nya, sekeda atur pengawa udah dipejalai baka ngabas kandang pendam lama di Sekuar, ulu Sungai Baoh Burak, ngentakka langkau ba kubur niang, meresi kandang pendam, miring ba kubur niang sereta meri nama dewan mayuhguna sekula nya ke baru tembu digaga, pemeri ari Kaban Kunsil Nengeri (ADUN) Dalat Datuk Fatimah Abdullah.
Langgur penemu nya datai ari Kepala Pengajar SK Baoh Ulu Harun Siji pengudah beberapa kali baum enggau peranak menua nya, sereta nerima sukung ari bala tuai rumah ba kandang menua Baoh Ulu.
Atur pengawa nya udah dipejalai nitihka adat asal bansa Iban ti diketuaika anak Niang Kaunsilor Lambong Jalang empu, iya nya Tuai Rumah Simu Lambong, lalu pengawa miring diketuaika Tuai Rumah Balai.
Lebuh ke bejalai ngabas kubur nya, sida udah bekejang pukul 6 pagi sereta datai din urung pukul 11 pagi, diuluka Penulung Kanan 1 SK Baoh Ulu, Abus Junau.
Urung 100 iku bala apai indai, tuai rumah enggau raban ari sekula bisi enggau maya nya.
Program ke diatur raban sekula begempung enggau PIBG sereta dibantu Panitia Mata Pelajar Sejarah, Moral enggau Sivik sereta Kewarganegaraan nya, kena ngenang penyiru niang seraya ngiri nembiak enggau penemu sentang pemesai reti ngingatka sejarah sereta bebasaka pengawa ti udah dikereja orang tuai kelia.
Program nya tembu urung pukul 2.30 ngalihari disempulang pengawa makai beserumpu kelai gaga ati ke pemujur program nya.
Bela bisi ngulu program nya, Tuai Rumah Michael Chabo.