LUBOK ANTU: Kaban Parlimen Lubok Antu William Nyalau Badak ngelalau raban Keristin ba Pelilih Mit Lubok Antu lempung agi jari nyuaka pemeri kena ngemansangka Gerija St Philip Lubok Antu.
Ku iya, duit ke diberi nya ukai dikena ngereja utai bukai tang deka dikena ngaga Gerija St Philip.
Ku Nyalau, nengah pemeri ari rayat enggau perintah Barisan Nasional (BN), Gerija St Philip, Lubok Antu ulih digaga manah agi ngambika bisi endur bejalaika pengawa ti bekaul enggau batang pengarap.
“Suaka meh pemeri kita ngambika bisi dikena ngaga Gerija St Philip Lubok Antu sereta bisi keguna kita semua ditu,” pia ku iya bejaku ba Pengerami Merarau beserimbai enggau ngintu Hari Easter di Dewan MayuhGuna Kompleks Lumba enggau Main Lubok Antu, kemari.
Iya mega ngelalau raban Keristin di Lubok Antu ngemeranka ulah bebasaka orang ti megai batang pengarap bukai, ngambi ulah ke baka nya ulih mai pengelikun ngagai semua.
“Aku ngelalau kita semua ngambika majak berakup ngaga Gerija St Philip, Lubok Antu ti beungjus ngelui RM1 juta, lalu arapka nya ulih dipejalaika enggau mujur,” pia ku iya.
Beserimbai enggau pengerami nya, Nyalau ngungkupka Projek Mit Pemansang Menua Pesisir (MRP) RM39,000 kena mantu pengawa ngaga Gerija St Philip Lubok Antu ke baru.
Bela bisi ngulu pengerami nya, Bishop Aris Sumping Jinggan, DO Lubok Antu Jack Aman Luat enggau bala ketuai raban bansa ke bisi ba kandang menua Lubok Antu.