KUCHING: Mosyen ti minta ‘Private Members Bill’ dikena ngubah Kanun Tanah Sarawak 2014 ti dibantaika Baru Bian (PKR-Ba’Kelalan) enda diterima Kunsil Nengeri (DUN) kemari.
Nya berindik ari mosyen nya ti enda teulihka sukung majoriti ari Kaban Kunsil Nengeri maya pekara nya dibantai dalam Aum Kunsil Nengeri kemari.
“Kunsil Nengeri enda nerima mosyen ti dibantaika Baru berindik ari semina nerima sukung ari 14 iku kaban kunsil nengeri dibandingka enggau 52 iku ti enda setuju,” ku Speaker Kunsil Nengeri Datuk Amar Mohd Asfia Awang Nassar kemari.
Maya ti nyimpul bekaul usul nya Asfia madahka ubah perambu undang-undang nya ulih ngeruga kes bukai ti benung dipejalaika ba kot.
Kelimpah ari nya, Baru dalam aum pengarang berita di bilik media kemari madahka diri enda lantang ati ngagai pemutus Kunsil Nengeri.
Iya madahka ubah undang-undang nya enda ngeruga kes ti benung dipejalaika kot.
Taja pia iya enda ngenggaika pemayuh kes ke bedau tauka benung dalam proses dipecharaka ba kot.
Iya bepenemu Barisan Nasional (BN) patut beratka pekara bekaul enggau ubah undang-undang tanah ti meri penguntung ngagai raban bansa.
“Aku ngarapka sekeda kaban ari BN ulih meri perambu ubah nya ke pemanah raban bansa.
“Pekara tu patut dikemerat sereta randau patut diatur enggau raban bansa, laban tu manah ke semua raban bansa,”ku Baru.