Dikarang Jacqueline David, Chris Bishop //
PEMANSANG MENUA PESISIR DIKEMERAT: Taib lebuh meresa Baris Basa Batalion ke-11 PGA di luar komplek Kunsil Nengeri ditu, kemari madahka pemansang di menua pesisir terus dikemeratka.
KUCHING: Bepelasarka pemesai nengeri Sarawak sereta pemayuh raban bansa ke nguan genturung pendiau ke enda sebaka penyampau, program pemansang menua pesisir tetap dikemeratka.
Tuai Pemegai Menua, Tuan Yang Terutama (TYT) Yang Dipertua Negeri Sarawak, Pehin Sri Abdul Taib Mahmud madah, semina enggau chara ngemansangka menua pesisir, seraka kualiti pelajar enggau pengerai di entara sitak menua pesisir enggau mengeri ulih dikurangka.
“Pemisi infrastruktur sereta palan servis pengawa rama nyadi penyungkak aktiviti ekonomi di sitak menua pesisir ulih ngemansangka kaul pengawa dagang entara sitak nengeri enggau menua pesisir.
“Nya alai mensia mayuh ke diau di menua pesisir dikarap meri sukung sida iya ngagai projek pemansang ke diperambu sereta digaga Perintah ke pemaik sereta pengelantang sida iya empu,” ku Taib.
Taib ti mega keterubah iya dalam pangku pengawa iya nyadi TYT madah baka nya lebuh bejadika Aum Keterubah ke Penggal Ke-empat, Aum Kunsil Nengeri Ke-17, ti belabuh ari sehari tu (kemari) 5 nyentuk 15 Mei tu.
Iya mega madah, kelimpah ari sektor ngaga barang sereta servis, pampang pengawa betanam betupi mega bisi peluang besai nyungkak penumbuh ekonomi sereta pemansang menua Sarawak.
Nya alai, ku iya, ba bagi pengawa betanam betupi begunaka transformesyen nguing ngagai pengawa betanam betupi chara moden sereta komersil, kena narit mayuh agi pengawa nanam puku dalam bidang nya.
“Pengawa nanam puku dalam bagi pengawa betanam betupi mega deka muka peluang pegawa dagang sereta pengawa ngaga rayat kelebih agi sida ke diau di menua pesisir. Mayuh agi pengawa pansik sereta pemansang (R&D) patut dipejalaika kelebih agi dalam ngemansangka mekanisma pengawa betanam betupi, ngemansangka produk nya, sereta ngerembaika makit produk nya ngagai menua luar,” ku iya.
Bekaul enggau pekara nya, iya madah kaul ari sepiak kompeni peribit nengah chara ‘kunsi pintar’ enggau Perintah sereta Palan Pansik diperansangka dalam ngemansang pengawa betanam betupi datai ke jemah ila.
“Rebak nembiak nyengkaum bala graduan diperansang ngereja pengawa industri agro-tani laban pengawa tu mai penguntung. Enggau pemisi perengka guna, pengawa latih sereta insentif ti disediaka Perintah, ulih ngelatih orang dagang rebak nembiak ke bisi pengeland Taib mega ngarapka sida ke bumai kelebih agi di sitak menua pesisir ngena chara ‘konsep pengawa betanam betupi nya siti pengawa dagang’.
“Nengah konsep nya, pemisi orang betanam betupi deka nambah enggau chara nyual asil betanam betupi sida iya,” ku iya.
Kelimpah ari nya, pengawa Perintah ngemansangka pampang betanam betupi ngena chara moden sereta komersil deka mantu ngemujurka atur jamin pengelikun pemakai lalu ulih ngurangka bil import pemakai sereta produk betenam betupi menua tu, ku iya.
Berindik ari nya, iya madah Perintah deka terus mantu sida ke meskin seranta di menua tu nengah mayuh macham program ngemunaska penyeranta udah digaga mungkur semua pemansang fizikal, ekonomi sereta modal mensia.
“Taja pia, pengawa bansa tu ukai semina bepanggai ba bahu Perintah aja tang begunaka kerejasama sereta sukung ari tiap renggat mensia mayuh nyengkaum Gerempung Ukai Dikuasa ulih Perintah (NGO) di menua tu. Aku pechaya pemerat ke dipandangka Perintah nengah perambu sereta ngatur mayuh macham program ngemunaska penyeranta ke holistik) deka ngurangka penyampau meskin seranta di menua Sarawak,” ku iya.
Kelimpah ari nya mega, mayuh macham program bisi digaga ke sida ke ngembuan pemisi ke mit kena ngelempungka penusah pengelantang pendiau berindik ari kos pengelantang pendiau ke majak niki, ku iya.
“Rayat ke betapi enggau penusah bansa tu dilalau ngambi ulih ari tiap program sereta bantu ti bisi disedia ulih Perintah. Lalu pia mega, aku ngelalau tiap renggat ke ngangkatka program tu, terus ngemujurka agenda ngemunaska meskin seranta di menua tu,” ku iya.
Taib nandu baru, Perintah mega betatika pemerat indai tunggal sereta sida ke timpang pendiau (OKU) di dalam agenda pemansang menua.
“Mayuh program sereta bantu udah diperambu sereta digaga kena mantu raban tu, ngangkatka kualiti pendiau sida iya. Tu terang endar mandangka Perintah seruran komited dalam nyaga nasit rayat, enda ngira bansa sereta penatai sida iya,” ku iya.