Anda di sini

Seraya ngabas rayat, Doris betemu enggau tamang iya lebuh maya ‘Nemuai & Berambih’

Advertisement

LUBOK ANTU: Taja pan udah setaun enda betemu, Senator Datuk Doris Sophia Brodie ngawakka diri betemu enggau seiku anak mit ke ada sereta diberi iya nama setamang enggau nama iya empu (Doris) lebuh ke bekimpin maya Pengawa Bepilih Besai ke-13 taun seiti nyin tadi.

Doris betemu enggau anak mit nya lebuh ke ngulu program ‘Nemuai & Berambih’ ti diatur Biro Tata Negara kena Hri Minggu nyin tadi ba Rumah Guyu, Nanga Ukom, urung sejam setengah pejalai nepan perau ari tekad  hidro Batang Ai.

Laban ke gagit ati betemu enggau anak mit ke diberi iya nama Doris, senator ke mega Ketuai Indu PRS sereta kaban exco bisi mai kek hari pengada ungkup anak mit (Doris) nya  ke baru beumur setaun.

Kena mandangka pengaga ati iya, Doris Brodie lalu nyuaka pemeri ari iya empu RM200, lalu RM200 agi diberi presiden PRS Tan Sri Datuk Amar Dr James Masing. Nengah awak nya mega iya ngungkupka geran RM8,000 ngagai rumah panjai nya.

Anak mit ke diberi iya nama Doris  nya ada kena pagi 27 April taun seiti nyin tadi, ke alai maya nya suba raban ari PRS nyengkaum Masing enggau Doris bisi datai bekimpin kia.

Pengudah ti diadaka, nembiak mit nya enda nusu urung 10 jam laban indai iya bisi penanggul ngemansutka ai tusu. Nemu penanggul ke baka nya,  Masing nadai betangguh nyuaka bantu sereta nyuruh raban iya nurun ke pasar ngena helikopter meli tusu ke anak mt nya.

Lebuh ke bejaku ba pengerami kena Hari Mi nggu nya, Doris madahka diri gagit endar ati laban ulih betemu enggau nembiak mit (Doris) ke udah beumur setaun berebak enggau maya PRU ke-13 suba.

“Aku berasai gaga endar ati laban ulih nemuai kitu sekali agi kelebih agi betemu enggau anak mit ( Doris) ke diadaka maya aku ke datai bekimpin ngagai rumah panjai kita ditu taun seiti nyin tadi. Aku mega meri terima kasih ngagai Biro Tata Negara laban ke udah ngatur program ‘Nemuai & Berambih’ tu.

“Kebuah aku datai k itu laban deka meri terima kasih ngagai kita semua ketegal udah nyukung Barisan Nasional ba Pengawa Bepilih Besai Ke-13 suba. Aku mega arapka kita meri sukung ke sebaka maya Pengawa Bepilih Kunsil Nengeri ke deka diatur dudi tu ila,” pia ku iya.

Doris ke mega Sapit speaker Dewan Negara madah, pengari rayat BN endang talukka rayat sereta ukai semina datai ngabas rayat maya pengawa bepilih aja.

“Pengari rayat kita endang seruran ngenyemakka diri sereteta deka nemu penanggul ke ditapi kita sereta nyadika jematan kena ngaul perintah menua enggau perintah perintah besai  ngambi ulih mai mayuh agi pemansang ngagai rayat di menua pesisir.” pia ku iya .

Berebak enggau nya, iya ngelalau peranak rumah panjai nya bejejaga enggau sekeda orang politik ke semina nemu bejaku lalu deka nguntungka diri empu aja, laban ulah sida semina nyadung pekara ke enda manah ngambika peranak menua pesisir tinggal ari pemansang ke dibai perintah BN.

Iya mega minta sida ngemeratka pelajar sekula anak sida. Ku iya, bala nembiak patut diperansang besekula laban nya meh endang tanggunpengawa apai indai enggau bala ke tuai meransang bala nembiak ngambika sida nyulut ba pelajar sekula.

“Semina nengah pelajar sekula aja ulih ngubah gaya pengidup bansa kitai di menua pesisir ngambika manah agi jemah ila.

“Kita semua patut nemu raban bansa ke bepelajar deka nyadi raban bansa ke progresif, lalu pekara ke baka nya beguna amat ba raban bansa kitai. Perintah udah nyendiaka mayuh macham perengkaguna baka sekula, nya alai kena meh perengkaguna nya ngambi pulaika pemaik ngagai kita jemah ila,” pia ku Doris.

Bela bisi ngulu pengerami nya, Kaban Parlimen Lubok Antu ke mega Mandal presiden PRS, William Nyallau, Skreteri Politik Kepala Menteri, Angeline Umih Tujok ke mega seiku ari kaban Kaunsil Besai PRS.

Advertisement