KUCHING: Keterubah ngindik kaki di Komplek Kunsil Nengeri (DUN) pengudah bulih gelar nyadi ‘Yang Berhormat’ bepun ari pemujur pengawa Bepilih Mit (PRK) Balingian apin lama ke udah, iya ngulu aum keterubah enggau kaban kunsil nengeri bukai ba Aum Renggat Ke-4 Kunsil Nengeri (DUN) Sarawak Ke-17 kemari, tentu sebengkah peneleba ke deka dikenang iya belama.
Ku Yussibnosh, kandang berapa hari ke udah, sebedau Aum DUN belabuh, mayuh macham utai ke diperundingka iya lalu bisi mega asai enda tentu, nyangka nya enda ulih dijangka peneleba ke deka ditapi iya dalam kandang 10 hari baum tu ila.
“Aku berasai gaga ati sereta deka meda kediri Aum DUN sekali tu, laban tu keterubah aku ngindik kaki kitu.
“Ke diatu, aku belajar merati lalu ninga debat ke deka dibantai kaban kunsil nengeri bukai maya aum tu ila,” ku iya ke ransing ati deka belajar enggau silik agi.
Iya madah, peluang bansa tu patut dikena enggau manah, lalu iya empu bisi udah nyendiaka sekeda tanya ke deka dibantai maya aum tu ila.
“Entara pekara ke deka ditanya aku, iya nya pemayuh udah nambah Ketuai Raban Bansa enggau Tuai Kampung (TK) ba renggat pelilih menua laban pemayuh mensia majak nambah, kelebih agi di sitak menua Mukah,” ku iya.
Iya madah, pejalai opis perintah sereta pemerat nambah penyampau ketuai di renggat menua tu berat.
Iya madah peneleba iya ke kala gawa enggau Opis Perintah nyadi Pemesai Opis Pelilih Menua dikena iya maya nyadi ADUN diatu, dalam ngemansangka sitak enggau menua tu.
“Aku ngarapka Perintah ulih ngemansangka sitak Balingian chara sistematik,” ku iya.
Lebuh ditanya baka ni asai masukka baju DUN, Yussibnosh lalu madah keterubah iya, sigi lain asai laban enggaika salah kena.
Maya PRK DUN Balingian March tu tadi, Barisan Nasional (BN) mujur ngetanka kerusi nya enggau majoriti lebuh ngalahka chalun Parti Keadilan Rakyat (PKR), nengah 6,911 undi.