KANOWIT: Menteri Muda Dagang Temuai enggau Pemansang Tanah, Gramong Juna enda tepantup ati berindik ari projek ai beresi di sitak Machan enda ulih putar enggau manah.
Iya madah, projek bekal ai ba Machan beungkus RM44 milliun tang agi bisi rumah panjai empai disambung ngena paip.
“Aku ngarap ejensi tauka opis ti bekaul enggau projek tu ulih nerangka kebuah pekara tu tau nyadi ngagai peranak menua nya.
“Kitai suah ninga sebana rayat din,” ku iya madah maya Aum Komiti Pemansang Pelilih Kanowit ba Opis Pelilih Kanowit, hari Tiga minggu nyin kemari.
Aum sehari ti betuaika Pemesai Opis Pelilih Mit Kanowit Ibrahim Kipli sereta digulu ketuai ejensi enggau opis perintah ba pelilih nya enggau sitak Sibu.
Bela bisi datai maya tu iya nya Sekretari Politik Kepala Menteri Maurice Giri.
Gramong ti mega Kaban Kunsil Nengeri Machan madah, tiap bengkah projek pemansang ba pelilih nya patut dikemerat opis ti bekaul.
“Nya alai, ketuai opis ti bisi kaul enggau projek patut nurun meda pejalai projek ngambika rayat bela ngasaika pemansang nitihka tuju perintah sebedau nya.
“Enti bisi penanggul, terang ngagai rayat lalu udah nya bai ngagai opis menteri ti bekaul,” ku iya nandu.
Berebak enggau nya mega, iya nangkan bala ketuai opis perintah ngambika semampai bekerejasama begulai enggau perintah tauka opis menteri dikena nentuka pemujur projek pemansang ba pelilih menua nya ulih dipejalai enggau mujur.
Ketegal nya, iya minta tikas pemujur projek Jalai Kapit-Song-Kanowit ngagai piak ti bekaul maya aum nya.
“Semua penanggul rayat bekaul enggau projek pemansang di Kanowit patut dikemataka enggau silik. Pegai tanggungpengawa diri enggau manah ngambika semua projek bejalai enggau mujur,” ku iya.