KUCHING: Penyerakup dalam perintah Barisan Nasional (BN) nyadi sebengkah pekara ti dikemerat lalu enti bisi raban nguji ngeruga pemaik nya, sida patut ngebuka diri dulu, ku Presiden Parti Demokratik Progresif Sarawak (SPDP) Tan Sri William Mawan.
Ngenang senentang pemutus sayap indu SPDP ti deka ngenuku mosyen enda pechaya ke presiden, Mawan enda lantang ati madah, raban sida tu patut ngesan semua pangka ke tau nyadi asil ari pemutus sida.
“Sayap Indu SPDP, keterubah di menua tu ngelaban presiden. Aku enda kala ngelaban sida sereta nadai isu ti enda kala diputar enggau sida ngelamatu.
“Aku pechaya pemutus sayap indu tu dipelaba bisi nerima achuk ari sekeda orang lalu aku enda ulih ngelak pekara tu nyadi,” ku iya.
Mawan mansutka jaku tu lebuh dikerandau pemberita pengudah ngulu pengawa bejadika Aum Kunsil Nengeri (DUN) ti Ke-17, Sidang Ke-1 Renggat Ke-4 di Begunan DUN Petra Jaya ditu, kemari.
Nyaut tanya pemberita sekalika iya setuju enti Kepala Menteri Tan Sri Datuk Amar Adenan Satem masuk champur nyaup mutarka penyarut dalam SPDP, Mawan madah iya nadai penanggul ba senentang pekara nya.
“Nadai salah, kitai bela megai tanggungpengawa ngintu pemaik dalam BN. Kitai ngemeratka penyerakup dalam BN lalu ukai deka ngemujur agenda sekeda raban ti bekenaka macham chara ngambika nyapai juluk diri.
“Aku pechaya sekeda raban nengah chara belalai nguji ngeruga pemaik parti, bemainka politik duit enda manah ba politik.
“Aku ngarapka sida ngubah runding diri diatu lalu enti dipajak, kitai deka ngiga jalai mutarka pekara tu ti dipeda tau bendar ngeruga penegap BN,” tandu iya.